Reduktimi i konsumit të kripës mund të ulë tensionin e gjakut brenda vetëm një jave, sipas ekspertëve të ushqyerjes. Për shumë njerëz, ndryshimet pozitive mund të shfaqen më shpejt sesa mendohet, veçanërisht nëse dieta e tyre përmban sasi të larta natriumi. Pothuajse gjysma e të rriturve në Shtetet e Bashkuara vuajnë nga tensioni i lartë i gjakut, një gjendje që rrit ndjeshëm rrezikun për sëmundje të zemrës dhe goditje në tru. Ndryshimet në stilin e jetesës dhe ushqyerje konsiderohen ndër mënyrat më efektive për ta kontrolluar atë. Kripa, ose natriumi, tërheq dhe mban ujin në organizëm, duke rritur volumin e gjakut dhe presionin mbi muret e arterieve.
Kur konsumohet në sasi të tepërta për periudha të gjata, ajo mund të ushtrojë ngarkesë shtesë mbi zemrën dhe sistemin kardiovaskular. Ekspertët sqarojnë se kjo nuk nënkupton eliminimin e plotë të kripës nga dieta. Në vend të kësaj, rekomandohet ulja e sasisë së kripës së shtuar, e cila gjendet kryesisht në ushqimet e përpunuara dhe ato të gatshme. Mesatarisht, amerikanët konsumojnë rreth 3,300 miligramë natrium në ditë, ndërsa për personat me tension të lartë rekomandohet një kufi prej rreth 1,500 miligramësh në ditë. Shumica e natriumit nuk vjen nga kripa që shtojmë gjatë gatimit apo në tavolinë, por nga produkte si sallamet, supat e konservuara, patatinat, salcat, ushqimet e ngrira dhe vaktet në restorante.
Një studim zbuloi se ndjekja e një diete me pak natrium për vetëm një javë rezultoi në një ulje mesatare prej tetë pikësh të presionit sistolik të gjakut krahasuar me një dietë të pasur me natrium. Megjithatë, rezultatet mund të ndryshojnë nga një person te tjetri, në varësi të mënyrës së ushqyerjes, medikamenteve që përdor dhe faktorëve të tjerë të stilit të jetesës. Përveç kufizimit të kripës, ekspertët rekomandojnë dietën DASH (, e cila konsiderohet një nga mënyrat më efektive për uljen e tensionit të gjakut. Kjo dietë fokusohet në konsumimin e frutave, perimeve, drithërave të plota, bishtajoreve dhe produkteve të qumështit me pak yndyrë, duke siguruar gjithashtu kalium, magnez dhe kalcium – minerale që ndihmojnë në rregullimin e tensionit.
