Ndërsa mijëra trupa shtesë amerikane mbërrijnë në Gjirin Persik, Presidenti Trump po shqyrton dy operacione jashtëzakonisht të rrezikshme që mund të përshkallëzojnë konfliktin ose të çojnë në një recesion ekonomik global.Mbërritja e mijëra trupave të reja amerikane në rajonin e Gjirit Persik po shoqërohet me përgatitje për skenarë të mundshëm ndërhyrjeje tokësore brenda territorit iranian. Sipas raportimit të revistës amerikane The Atlantic, drejtues ushtarakë në SHBA po analizojnë dy opsione kryesore operacionale.
Burime me njohuri mbi planet bëjnë të ditur se skenari i parë parashikon marrjen nën kontroll të ishullit Kharg, një nyje kyçe për eksportet energjetike të Iranit. Skenari i dytë synon kapjen e uraniumit të pasuruar, me qëllim frenimin e programit bërthamor të Teheranit. Nëse këto operacione marrin miratimin politik, ato do të përbëjnë ndërhyrje me rrezik të lartë, pa garanci për përfundimin e konfliktit apo ndryshimin e regjimit.
Në terren, rreth 3.500 marinsa amerikanë kanë mbërritur gjatë fundjavës së kaluar, ndërsa një numër i ngjashëm pritet të dislokohet në javët në vijim. Këto forca pritet të mbështesin njësitë ekzistuese të operacioneve speciale, të përbëra nga qindra trupa të trajnuara për misione komplekse.
Kontrolli i ishullit Kharg konsiderohet nga Uashingtoni si një mjet presioni ekonomik, pasi përmes tij kalon rreth 90% e eksporteve të naftës së Iranit. Megjithatë, një operacion i tillë paraqet vështirësi të mëdha ushtarake, përfshirë lundrimin në ujëra të minuara dhe përballjen me sulme nga dronë dhe raketa. Edhe në rast suksesi, mbajtja e ishullit do të kërkonte një prani të zgjatur ushtarake.
Pasojat ekonomike vlerësohen të menjëhershme në tregjet globale. Çmimi i naftës Brent mund të rritet ndjeshëm, duke kaluar nga 100 në 150 dollarë për fuçi, me ndikim të drejtpërdrejtë në ekonominë botërore. Në të njëjtën kohë, efektet mbi ekonominë iraniane do të kërkonin më shumë kohë për t’u reflektuar.
Skenari alternativ, që përfshin ndërhyrje për kapjen e uraniumit të pasuruar brenda territorit iranian, mbart rreziqe të larta operacionale. Një mision i tillë do të kërkonte ndërhyrje ajrore, përballje të drejtpërdrejtë me forcat iraniane dhe përfshirjen e njësive të specializuara për menaxhimin e materialeve radioaktive.
Ndërkohë, presioni politik brenda SHBA-së po rritet. Sondazhet tregojnë se një pjesë e konsiderueshme e opinionit publik kërkon përfundimin e shpejtë të konfliktit. Rritja e çmimit të karburantit, që ka kaluar nivelin e 4 dollarëve për gallon për herë të parë që nga viti 2022, po shton shqetësimet në prag të zgjedhjeve.
Brenda administratës amerikane evidentohet ndarje në qëndrime. Disa figura politike dhe aleatë ndërkombëtarë mbështesin një qasje më të ashpër ndaj Iranit, ndërsa zëra të tjerë paralajmërojnë për kostot politike dhe strategjike të një konflikti të ri në Lindjen e Mesme.
Zhvillimet tregojnë një situatë të ndërlikuar, ku opsionet ushtarake shoqërohen me rreziqe të larta dhe pasoja të gjera në nivel rajonal dhe global.
