Manjatë të teknologjisë, figura të fuqishme të Wall Street-it, politikanë të nivelit të lartë dhe emra nga Hollivudi përmenden në dokumentet që Departamenti i Drejtësisë i SHBA-së publikoi për çështjen Epstein. Financieri depërtoi në nivelet më të larta të pasurisë dhe pushtetit global.
Jeffrey Epstein, një shkelës seksual i dënuar, i cili vdiq në burg në vitin 2019, luajti rol qendror në një lloj “Davos-i” jozyrtar e paralel: një rrjet global, një “ekosistem pasurie dhe pushteti” ku përfshiheshin aristokratë, zyrtarë të lartë të botës financiare dhe ish-krerë shtetesh e qeverish në të dy anët e Atlantikut.
Vëmendje po i kushtohet “metodës Epstein”, pra mënyrës se si financieri tashmë i ndjerë dhe bashkëpunëtorët e tij grumbullonin me këmbëngulje kontakte, shkëmbenin favore dhe e mjegullonin kufirin mes marrëdhënieve personale dhe ndikimit publik.
Epstein shfrytëzonte lidhjet që kishte dhe u frynte rëndësinë për të forcuar pozitën e tij mes të pasurve dhe të pushtetshmëve të botës, një praktikë që vazhdoi deri në arrestimin e tij në korrik 2019, me akuza për shfrytëzim seksual dhe komplot për trafikim të të miturve.
Qoftë kur pranonte propozime për darkë në Paris, qoftë kur shfaqej në Davos, qoftë kur pranonte ftesa për ishullin e tij privat në Karaibe, ku, sipas prokurorëve, ai trafikonte dhe abuzonte seksualisht me vajza të mitura, Epstein, shpesh në bashkëpunim me bashkëpunëtoren e tij prej vitesh Ghislaine Maxwell, u paraqitej njerëzve të tij si mik i kujdesshëm dhe i dhembshur. Ata ndanin me të detaje personale nga jeta private dhe i kërkonin këshilla për çështje profesionale ose personale.
“Miliarderët dhe njerëzit shumë të pasur pëlqejnë të qëndrojnë të bashkuar”, tha William Cash, themelues dhe ish-pronar i Spear’s Magazine, një botim britanik dy-mujor për persona me pasuri të lartë neto, dhe kryeredaktor i Mace. “Ata janë një lloj klubi më vete dhe u pëlqen të krijojnë lidhje mes tyre.”
“Eja të më shpëtosh. Po vdes nga mërzia”
Korrespondenca e tij me të pasurit dhe të pushtetshmit tregon se Epstein dinte t’u ofronte bashkëbiseduesve atë që ata kërkonin: këshilla udhëtimi e pune, shaka me përmbajtje seksuale, ose një shëtitje në Paris për të admiruar monumentet.
Jack Lang, ish-ministër i Kulturës i Francës, e përshkroi Epstein si një “Dr. Jekyll dhe Mr. Hyde” të rafinuar.
“E njoha përmes Woody Allen-it,” i cili është “mik”, tha Lang për BFM TV.
“Vinte shpesh në Paris për ekspozita arti… Jeffrey që njihja unë ishte një njeri i pasionuar pas artit, sharmant,” theksoi ai, duke shtuar se “nuk dinte asgjë për krimet e Epstein”.
Megjithëse Epstein kishte pranuar fajësinë në vitin 2008 për joshje të të miturve për prostitucion, ai arriti të fitojë simpati te drejtues të lartë, politikanë me ndikim dhe anëtarë të familjeve mbretërore. Këta i besonin atij detaje për vështirësitë e tyre të përditshme dhe, njëkohësisht, i përgjigjeshin tonit të tij lozonjar.
“Eja të më shpëtosh. Po vdes nga mërzia,” i kishte shkruar princesha Mette-Marit e Norvegjisë në një shkëmbim emailesh në vitin 2012.
3 milionë faqe, 180.000 imazhe, 2.000 video
Lista e të pasurve dhe të pushtetshmëve që kanë lidhje me Epstein u zgjerua, teksa qeveria amerikane publikoi miliona dokumente të reja nga hetimi për çështjen. Publikimi më i fundit i materialeve, më 30 janar, përfshin 3 milionë faqe, 180.000 imazhe, 2.000 video dhe shumë emra të njohur si Richard Branson, Bill Gates dhe Elon Musk.
Nuk ka asnjë tregues se prania e emrit të tyre në dokumente nënkupton shkelje ligjore, ndërsa shumë prej atyre që ishin përmendur në publikime të mëparshme e kanë mohuar kategorikisht përfshirjen në “rrjetin e errët” të Epstein. Publikimi u bë mbi bazën e Ligjit për Transparencën e Dosjeve Epstein, i cili u nënshkrua nga presidenti Trump në nëntor, pas presionit.
Ligji kërkon publikimin e plotë të të gjitha dokumenteve që lidhen me Epstein. Megjithatë, deputetë demokratë dhe disa republikanë thonë se administrata Trump ende nuk e ka përmbushur detyrimin dhe po mban të fshehura dokumente. Më poshtë vijon një listë me disa prej personave që përmenden në çështje:
Elon Musk
Themeluesi miliarder i Tesla-s shfaqet herë pas here në dokumentet e publikuara, kryesisht në shkëmbime emailesh në vitet 2012 dhe 2013, ku diskutohet një vizitë në kompleksin famëkeq ishullor të Epstein në Karaibe.
Nuk është e qartë nëse vizitat në ishull u realizuan, ndërsa Musk ka thënë se nuk e ka vizituar kurrë ishullin privat të Epstein. Ai ka deklaruar se i ka refuzuar disa herë propozimet e financierit të diskredituar. “Epstein u përpoq të më bindte të shkoja në ishullin e tij dhe unë refuzova,” shkroi ai në X në vitin 2025. Megjithatë, në nëntor 2012, miliarderi kishte shkruar në një email: “Cila ditë/natë do të jetë festa më e shfrenuar në ishullin tuaj?”
Në një tjetër email, në dhjetor të po atij viti, ai shkroi: “Dua vërtet të jem në festa në St. Barts ose diku tjetër dhe të çlirohem,” duke shtuar se një “përvojë e qetë në një ishull” është e kundërta e asaj që dëshiron. Musk iu përgjigj një postimi në X në janar, duke pranuar se emailet mund të përdoren për të “njollosur emrin tim”, por tha se e shqetëson më shumë ndjekja penale “e atyre që kryen krime serioze me Epstein”.
Bill Gates
Dy emaile të 18 korrikut 2013 duken sikur janë hartuar nga Epstein, por nuk është e qartë nëse janë autentike apo nëse iu dërguan ndonjëherë bashkëthemeluesit të Microsoft-it, Bill Gates. Njëri është shkruar si letër dorëheqjeje nga Fondacioni Bill & Melinda Gates dhe shpreh ankesa se iu desh të siguronte ilaçe për Gates “për të përballuar pasojat e seksit me ruse”.
Tjetri, që nis me “i dashur Bill”, ankohet gjithashtu se Gates i dha fund një miqësie dhe pretendon se ai u përpoq të fshihte një infeksion seksualisht të transmetueshëm, përfshirë nga bashkëshortja e atëhershme, Melinda. Në një intervistë për NPR, ish-bashkëshortja e Gates tha se publikimi i dokumenteve i solli kujtime nga momentet më të vështira të martesës së tyre.
“Me trishtim, mund t’i shoh këto vajza të reja dhe të them, Zot, si u ndodhi kjo?” tha ajo. “Të paktën unë munda të vazhdoj jetën time dhe shpresoj të ketë drejtësi për ato vajza që tani janë gra.” Një përfaqësues i Gates i tha BBC-së: “Këto pretendime – nga një gënjeshtar i provuar dhe i pakënaqur – janë krejtësisht absurde dhe plotësisht të rreme.”
Donald Trump
“E njoh Jeff-in prej 15 vitesh. Tip i mrekullueshëm,” thoshte Trump në revistën New York për një profil të Epstein në vitin 2002. “Është shumë argëtuese të jesh me të. Thuhet madje se i pëlqejnë gratë e bukura aq sa mua, dhe shumë prej tyre janë më të reja.” “Nuk ka dyshim për këtë, Jeffrey e shijon jetën e tij shoqërore.”
Presidenti amerikan më pas tha se të dy u grindën në fillim të viteve 2000, vite përpara arrestimit të parë të Epstein, ndërsa mohon në mënyrë të përsëritur çdo shkelje në këtë çështje. Seti i ri i dokumenteve përmban mijëra referenca për presidentin amerikan, shumë prej të cilave hedhin pak më shumë dritë mbi marrëdhënien e dy burrave. Ato përfshijnë emaile ku Epstein dhe të tjerë ndanin artikuj lajmesh për Trump, komentonin politikat e tij ose i referoheshin atij dhe familjes së tij.
Departamenti i Drejtësisë publikoi gjithashtu një tabelë të krijuar gushtin e kaluar, që përmbledhte telefonatat në linjat e informacionit të forcave të rendit nga persona që pretendonin se kishin dijeni për shkelje të supozuara të Trump. Shumë prej tyre duket se bazohen në informacione të paverifikuara të marra nga agjencia dhe u bënë pa prova mbështetëse.
Lista përfshin ankesa të shumta për abuzim seksual kundër Trump, Epstein dhe personave të tjerë me profil të lartë. Zëvendësprokurori i Përgjithshëm Todd Blanche tha të dielën se FBI mori në konsideratë “qindra telefonata” për individë të njohur që “u vlerësuan shpejt si të pabesueshme”. Trump e ka mohuar vazhdimisht çdo shkelje lidhur me Epstein, me të cilin thotë se e ndërpreu kontaktin dekada më parë, ndërsa nuk është akuzuar për asnjë krim nga viktimat e rrjetit.
Andrew Mountbatten-Windsor
Fotografi që duket se tregojnë Andrew Mountbatten-Windsor duke u gjunjëzuar mbi një grua të shtrirë në tokë u përfshinë gjithashtu në publikimin më të fundit të dosjeve të Epstein. Në dy prej imazheve, ish-princi duket se e prek personin – i paidentifikuar dhe plotësisht i veshur – në bark. Një tjetër imazh e tregon atë duke parë drejtpërdrejt kamerën.
Për fotografitë nuk jepet kontekst dhe nuk është e qartë kur dhe ku janë bërë. Ai i ka mohuar vazhdimisht çdo shkelje. Zbulimet e reja për përfshirjen e Andrew në skandalin Epstein, sipas raportimit, u bënë pika që “mbushi kupën” për Mbretin Charles, i cili vendosi t’i hiqte titullin e princit.
Richard Branson
Emri i Richard Branson shfaqet qindra herë në dosje. Në një shkëmbim mesazhesh të vitit 2013, Epstein e falënderon Branson për mikpritjen e fundit dhe për këshillat e tij për marrëdhëniet me publikun; Branson i përgjigjet se ishte “shumë bukur” që u panë, duke shtuar: “Do të doja shumë t’ju shihja sa herë që jeni në zonë. Mjafton të sillni haremin tuaj!”
Grupi Virgin sqaroi se termi “harem” i referohej tre anëtarëve të rritur të ekipit të Epstein. Në një deklaratë për BBC, Virgin Group tha se kontakti i Branson me Epstein ndodhi “vetëm disa herë më shumë se dymbëdhjetë vjet më parë” dhe u kufizua në evente në grup ose profesionale, si një aktivitet bamirësie në tenis.
“Kur Epstein ofroi një donacion bamirësie, Branson-ët i kërkuan ekipit të tyre të kryente verifikimet e nevojshme përpara se ta pranonin, gjë që zbuloi akuza serioze,” shtoi deklarata. “Si rezultat, Virgin Unite nuk e pranoi donacionin dhe Richard e Joan vendosën të mos takoheshin ose të mos flisnin më me Epstein. Miliarderi i konsideron veprimet e Epstein të neveritshme dhe mbështet të drejtën për drejtësi për viktimat e shumta të tij.”
Sarah Ferguson
Sarah Ferguson, ish-bashkëshortja e Andrew Mountbatten-Windsor, e njohur si “Fergie”, përmendet gjithashtu në shumë emaile, përfshirë edhe periudhën kur Epstein ishte ende në arrest shtëpie.
Një email nga një llogari që besohet se i përkiste financierit thotë: “Mendoj se Fergie tani mund të thotë se unë nuk jam pedofil.” Në një tjetër shkëmbim emailesh nga prilli 2009, shfaqet një kërkesë për t’u takuar me Epstein për një “çaj të shpejtë”, me fraza si: “I dashur, mik i jashtëzakonshëm dhe i veçantë Jeffrey. Ti je legjendë dhe unë jam shumë krenare për ty.”
Lord Mandelson
Sipas ekstrakteve bankare të publikuara në dosje, Epstein kreu pagesa prej 75.000 dollarësh në llogari të lidhura me Lord Mandelson, përfshirë pagesa drejt një miku të tij, Reynaldo Avila da Silva.
Policia Metropolitane nisi një hetim penal ndaj Lord Mandelson pas pretendimeve se ai i kishte dhënë Epstein informacione të ndjeshme për tregun. Në vitin 2009, një vit pasi Epstein pranoi fajësinë për joshje të të miturve për prostitucion, da Silva dërgoi një email duke kërkuar “çfarëdo që mund të më ndihmoni”. Epstein u përgjigj: “Do t’ju transferoj menjëherë shumën e huasë.”
Emaile të tjera duket se tregojnë Epstein duke rregulluar një vendqëndrim për Mandelson në një nga apartamentet e tij në Nju Jork, ku Epstein shkruan se është “i entuziazmuar t’ju presë” dhe “i trishtuar që nuk do të jetë aty”. Pas zbulimeve, Lord Mandelson njoftoi se do të largohej nga Dhoma e Lordëve, duke përsëritur keqardhjen që “e njohu ndonjëherë Epstein” dhe që vazhdoi marrëdhënien pas dënimit të tij.
Ai i tha BBC-së se “nuk ka qenë kurrë fajtor apo bashkëpunëtor në krime. Si të gjithë të tjerët, mësova të vërtetën reale për të pas vdekjes së tij”. Ai nuk iu përgjigj pretendimeve për rrjedhje dokumentesh, por BBC kupton se ai pretendon se nuk veproi në mënyrë kriminale dhe jo për përfitim personal. Ai thotë se kërkoi ekspertizën e Epstein për arsye të interesit kombëtar gjatë krizës financiare globale të vitit 2008.
Skandali mori përmasa të mëdha në Britani, ku kryeministri Keir Starmer kërkoi falje ndaj viktimave të Epstein, duke thënë se i vjen keq që emëroi si ambasador në SHBA Peter Mandelson, i cili ishte mik i ngushtë i të dënuarit për krime seksuale. Starmer tha se nuk e dinte sa e afërt ishte marrëdhënia e Mandelson me Epstein kur e emëroi në atë detyrë në dhjetor 2024.
Steve Bannon
Dosjet përmbajnë gjithashtu mijëra mesazhe që duket se janë dërguar mes Epstein dhe njërit prej ish-këshilltarëve kryesorë të Trump, Steve Bannon. Shumica e mesazheve u dërguan në 2018 dhe 2019, pasi Bannon u largua nga roli i tij në Shtëpinë e Bardhë gjatë mandatit të parë të Trump, teksa po përgatiste një film për Epstein para vdekjes së tij.
Një shkëmbim mesazhesh duket se tregon Bannon duke hartuar strategji me Epstein se si të ndryshonin rrëfimin rreth krimeve të tij të kaluara, duke sugjeruar se “së pari duhet t’u rezistojmë gënjeshtrave” dhe “ta rindërtojmë imazhin tuaj si filantrop”. Bannon nuk akuzohet për asnjë vepër penale dhe nuk iu përgjigj kërkesave për koment.
Miroslav Lajčák
Një shkëmbim mesazhesh në tetor 2018 mes Miroslav Lajçak, atëherë ministër i Jashtëm i Sllovakisë, dhe Epstein tregon se ata shkëmbenin mesazhe për vajza dhe diplomacinë. Pasi Epstein dërgoi një imazh, që nuk shfaqet në procesverbal, Lajčák përgjigjet: “Pse nuk më ftoni në këto lojëra? Do ta merrja vajzën MI’.”
“Kush nuk do ta bënte,” përgjigjet Epstein. “Mund t’i kesh të dyja, nuk jam posesiv. Dhe motrat e tyre.” Pas publikimit të fundit të dokumenteve, Lajčák dha dorëheqjen nga posti aktual si këshilltar i sigurisë kombëtare i Sllovakisë. Ai nuk akuzohet për asnjë vepër penale.
Howard Lutnick
Sipas email-eve të përfshira në publikimin e fundit, biznesmeni miliarder dhe sekretari amerikan i Tregtisë, Howard Lutnick, planifikonte një vizitë në ishullin e Jeffrey Epstein, Little St. James, me familjen e tij.
Në një email të dhjetorit 2012, bashkëshortja e Lutnick, Alison, i shkroi një asistenti të Epstein një ditë para vizitës: “Presim me padurim t’ju vizitojmë” dhe “Do të ishim shumë të lumtur t’ju takonim për drekë.” Në një tjetër email, dërguar një marrësi të koduar disa ditë më parë, Lutnick shkruan: “Përshëndetje Jeff… Të duket mirë nata e së dielës për darkë?”
Departamenti i Tregtisë tha në një deklaratë se “sekretari Lutnick pati ndërveprime të kufizuara me Epstein në praninë e bashkëshortes së tij dhe nuk është akuzuar kurrë për asnjë vepër penale”.
Larry Summers
Larry Summers, ish-sekretar i Thesarit i presidentit amerikan Bill Clinton dhe ish-president i Universitetit Harvard, përmendet gjithashtu në dokumentet e reja, ku ka referenca për takime dhe darka mes Summers dhe Epstein. Në emaile nga 2017, Summers dhe Epstein bënin shaka për Trump dhe e kritikonin gjatë mandatit të parë të tij.
“Bota nuk e kupton sa budalla është në të vërtetë,” tha Epstein për Trump në një email drejtuar Summers. Summers tha se mban “përgjegjësi të plotë” për vendimin e gabuar për të vazhduar komunikimin me Epstein dhe dha dorëheqjen nga disa pozicione, përfshirë rolin në bordin e drejtorëve të gjigantit teknologjik OpenAI.
Steve Tisch
Steve Tisch, bashkëpronar i New York Giants, shfaqet në publikimin e dokumenteve, ku përmenden informacione për një grua që ai e takoi në shtëpinë e Epstein. Në një shkëmbim emailesh, Tisch pyeti nëse gruaja ishte profesioniste apo jo.
Në emaile të tjera, Epstein i thotë Tisch se kishte një “dhuratë” për të dhe përshkruan një grua që do t’ia prezantonte si “banore e Tahitit që flet kryesisht frëngjisht dhe është ekzotike”. Në një deklaratë për CNN, Tisch tha se pati “një marrëdhënie të shkurtër” me Epstein, duke shtuar se “nuk pranoi asnjë nga ftesat e tij dhe nuk shkoi kurrë në ishullin e tij”.
Brett Ratner
Regjisori i dokumentarit të ri për Zonjën e Parë Melania Trump shfaqet gjithashtu në një fotografi nga dosjet, ku përqafon një grua të re. Ratner, i cili ka regjisuar edhe filmat Rush Hour dhe X-Men: The Last Stand, duket i ulur në një divan pranë Epstein dhe dy grave, identitetet e të cilave janë fshehur. Dosjet nuk japin tregues për shkelje.
Peter Attia
Influenceri kundër plakjes dhe bashkëpunëtori i CBS News, Peter Attia, shkëmbeu qindra emaile me Epstein, përfshirë komente të pahijshme, sipas dokumenteve të fundit të publikuara. Në emaile, ai shkroi se miqësia e tij me Epstein ishte diçka që mund ta ndante publikisht dhe përfshiu një diskutim për artikullin e Miami Herald të vitit 2018 që identifikoi disa nga viktimat e Epstein.
Ai bënte gjithashtu shaka me Epstein për anatominë femërore dhe veprime seksuale, siç tregojnë emailet. Më 2 shkurt, ai publikoi një deklaratë në X, duke mohuar se “është i përfshirë në ndonjë aktivitet kriminal”, duke shtuar se “nuk kam qenë kurrë në avionin e tij, kurrë në ishullin e tij dhe nuk kam qenë kurrë i pranishëm në ndonjë festë seksuale”.
Casey Wasserman
Presidenti i Lojërave Olimpike të Los Angeles 2028 kishte flirtuar me email me Ghislaine Maxwell, bashkëpunëtoren e burgosur të Epstein. Mesazhet e tij për Maxwell, të dërguara në 2003, e tregojnë atë duke shkruar: “Mendoj për ty gjithë kohën… Çfarë duhet të bëj, pra, që të të shoh me një veshje të ngushtë lëkure?”
Maxwell aktualisht po vuan një dënim 20-vjeçar për rekrutim dhe trafikim të vajzave adoleshente me qëllim abuzimin seksual nga Epstein para vdekjes së tij në paraburgim në 2019. Wasserman tha: “Më vjen thellësisht keq për korrespondencën time me Ghislaine Maxwell, e cila ndodhi më shumë se dy dekada më parë, shumë përpara se të dilnin në pah krimet e saj të tmerrshme.”
Sergey Brin
Sergey Brin, bashkëthemelues i Google dhe një nga njerëzit më të pasur në botë, vizitoi ishullin privat të Epstein dhe bëri plane për të darkuar në shtëpinë e tij në Nju Jork, sipas dokumenteve të deklasifikuara.
Ai korrespondonte gjithashtu me Ghislaine Maxwell, e cila i shkroi Brin në prill 2003: “Darkat te Jeffrey janë gjithmonë të këndshme, të qeta dhe jo formale” dhe “Pres me padurim t’ju shoh.” Në një tjetër email, Maxwell e ftoi Brin ta shoqëronte në një shfaqje filmi në Nju Jork. Në emaile nuk ka asnjë tregues për shkelje.
Ehud Barak
Ish-kryeministri izraelit Ehud Barak përmendet në dokumentet e publikuara së fundmi, të cilat tregojnë se ai korrespondonte në mënyrë të përsëritur me Epstein edhe pas dënimit të tij për krime seksuale në Florida në 2008.
Emaile të tjera tregojnë plane që Barak të qëndronte në rezidencën e Epstein në Nju Jork në 2017. Barak pranoi se pati ndërveprime të shpeshta me shkelësin e dënuar seksual, por tha se nuk vuri re dhe nuk mori pjesë kurrë në sjellje ose festa të papërshtatshme.
Të gjithë të përmendurit më sipër mohuan se kishin ndonjë lidhje me abuzimin seksual të vajzave dhe grave të reja. Megjithatë, disa prej tyre ruajtën miqësi me Epstein ose i ringritën ato edhe pasi lajmet e bënë atë gjerësisht të njohur si abuzues të dyshuar të vajzave të reja. Askush nuk është akuzuar për ndonjë krim të lidhur me hetimin. Epstein vrau veten në një qeli burgu në Manhattan në vitin 2019. /Përshtati Pamfleti/
