Presidenti amerikan Donald Trump është rikthyer me një deklaratë të fortë për Ngushticën e Hormuzit, duke thënë se i pëlqen ideja që kjo rrugë strategjike detare të shpallet territor i Shteteve të Bashkuara.
Duke folur të hënën me gazetarët në Zyrën Ovale, Trump nuk shpjegoi se mbi çfarë baze apo me çfarë mekanizmi mund të realizohej një hap i tillë.
“Më pëlqen ideja që ta shpallim Ngushticën e Hormuzit territor amerikan”, tha presidenti.
Ai shkoi më tej duke pretenduar se Uashingtoni tashmë ka kontroll mbi këtë korridor strategjik.
“Ne kemi kontroll të plotë mbi Ngushticën”, deklaroi Trump, duke shtuar se, sipas tij, Irani ndodhet në një gjendje shumë të dobët dhe ushtria e tij është “plotësisht e mundur”.
Deklaratat vijnë në një moment tensionesh të larta mes Uashingtonit dhe Teheranit dhe vetëm pak orë pasi përfundoi afati 60-ditor i memorandumit të mirëkuptimit mes dy vendeve.
Trump konfirmoi se Shtetet e Bashkuara nuk do të kërkojnë zgjatjen e memorandumit me Iranin. Sipas presidentit amerikan, iranianët kërkojnë një marrëveshje, por nuk janë të gatshëm të pranojnë kushtet që ai i konsideron të domosdoshme.
“Ata duan një marrëveshje, por nuk do ta bëjnë atë marrëveshje që unë mendoj se është e nevojshme”, tha Trump.
Presidenti foli gjithashtu për qarkullimin e naftës përmes Hormuzit, një nga korridoret më të rëndësishme energjetike në botë. Ai pretendoi se aktualisht po kalojnë miliona fuçi naftë në javë dhe se ngushtica mbetet e hapur.
Sipas Trump, çmimet e naftës po bien dhe do të vazhdojnë të bien, përveç rastit kur administrata e tij vendos të ndërmarrë masa “shumë më drastike” se ato që po zbaton aktualisht.
Deklarata merr peshë të veçantë për shkak të rëndësisë strategjike të Hormuzit. Ngushtica ndodhet mes Iranit dhe Omanit dhe përbën një nga arteriet kryesore të transportit të naftës dhe gazit nga Gjiri Persik drejt tregjeve ndërkombëtare. Çdo përshkallëzim ushtarak ose kufizim i lundrimit në këtë zonë mund të ketë pasoja të drejtpërdrejta në tregjet globale të energjisë.
Trump ndryshoi ndërkohë disi tonin ndaj Omanit. Vetëm disa orë më parë ai kishte kërcënuar se SHBA-ja do ta bombardonte vendin “pa mëshirë” nëse ndërhynte në përplasjen me Iranin. Në deklaratat e mëvonshme në Zyrën Ovale, presidenti tha: “Nuk mendoj se po sillen shumë mirë, por do të merremi me ta”.
Deklaratat e Trump për Hormuzin vijnë ndërsa perspektiva për një marrëveshje të re mes SHBA-së dhe Iranit mbetet e paqartë. Teherani ka akuzuar Uashingtonin se ka shkelur marrëveshjen e ndërmjetme, ndërsa administrata amerikane sinjalizon se nuk synon ta zgjasë atë.
Në këtë klimë, deklarata e Trump se do t’i pëlqente që Hormuzi të shpallej “territor amerikan” shton një element të ri në përplasjen për kontrollin e një prej korridoreve detare më strategjike në botë.
