Kryeministri izraelit Benjamin Netanyahu deklaroi të enjten se përmbysja e regjimit iranian mbetet një objektiv kryesor për Izraelin, duke argumentuar se realizimi i tij tashmë është “i arritshëm”.
Gjatë një takimi me drejtues të lartë ushtarakë në Tel Aviv, Netanyahu tha se udhëheqja iraniane ndodhet në një nga momentet e saj më të dobëta.
“Ky regjim po lëkundet. Është më i dobët se kurrë. Po lufton për mbijetesën e tij”, deklaroi kryeministri izraelit.
Netanyahu shkoi më tej, duke e përcaktuar ndryshimin e regjimit në Teheran si një nga synimet që Izraeli ka ende përpara.
“Jam i bindur se mund ta eliminojmë këtë kërcënim një herë e përgjithmonë, domethënë ta përmbysim këtë regjim”, tha ai, duke shtuar se ky objektiv “nuk është i pamundur” dhe tashmë është “i arritshëm”.
Deklaratat e Netanyahu-t vijnë në një periudhë të re përshkallëzimi në Lindjen e Mesme. Shtetet e Bashkuara kanë rifilluar sulmet kundër Iranit, pas një periudhe relative qetësie, ndërsa Teherani është kundërpërgjigjur me sulme ndaj objektivave të lidhura me aleatët amerikanë në rajon, përfshirë në Jordani, Kuvajt, Bahrein, Irak dhe Emiratet e Bashkuara Arabe.
Netanyahu vuri në dukje faktin se Izraeli nuk është goditur në valën e fundit të sulmeve iraniane dhe e interpretoi këtë si rezultat të fuqisë ushtarake dhe kapacitetit parandalues të vendit të tij.
“Nuk po na sulmojnë dhe kjo nuk është rastësi. Ata e njohin fuqinë tonë, forcën e armëve tona dhe vendosmërinë tonë”, tha Netanyahu.
Kryeministri izraelit u dërgoi gjithashtu një paralajmërim kundërshtarëve të Izraelit, duke u kërkuar të mos hyjnë në përplasje me vendin e tij dhe duke theksuar fuqinë ushtarake, vendosmërinë dhe unitetin e brendshëm të Izraelit.
Qëndrimi i Netanyahu-t për ndryshimin e regjimit në Iran nuk është shfaqur vetëm në deklaratat e së enjtes. Një ditë më parë, në një intervistë për i24NEWS, ai deklaroi se strukturat izraelite, nën drejtimin e tij, po punojnë për rrëzimin dhe mposhtjen e regjimit iranian.
Deklaratat e fundit e vendosin kështu përmbysjen e regjimit në Teheran hapur mes objektivave të shpallura nga udhëheqja izraelite, në një kohë kur konfrontimi ushtarak mes Iranit, Shteteve të Bashkuara dhe Izraelit vazhdon të mbajë të larta tensionet në rajon.
