Pasiguri: pas dekadash stabiliteti të mbështetur te industria automobilistike, Volkswagen ka njoftuar shkurtimin e 100 mijë vendeve të punës, ndërsa BMW edhe 8 mijë të tjera...Dikur ekzistonte një vend, himni i të cilit e përkufizonte veten me shprehjen “über alles in der Welt”: “mbi gjithçka në botë”. Sot, qytetarët e atij vendi, kur shkojnë me pushime, sidomos jashtë Gjermanisë, përballen me një lloj “krize ndërgjegjeje”.
Pse, pyet një editorial i botuar në numrin e fundit të Die Zeit, jashtë vendit “gjithçka duket se funksionon, edhe pse atje punojnë më pak se ne?”.
Dikur, një gjerman shkonte me pushime, nënkuptohet, në Itali, “shijonte tri javë anarki dhe kaos dhe më pas kthehej në shtëpi i çlodhur, me bindjen se në Gjermani gjërat funksiononin”. Tani, për gjermanët, udhëtimi jashtë vendit është kthyer në “një përvojë demoralizuese”: në vendet baltike ndihen inferiorë për shkak të nivelit të dixhitalizimit, në Kinë sepse industria kineze i ka tejkaluar dhe “madje edhe në Itali, trenat tani janë më të përpiktë se këtu. Çfarë na ka ndodhur?”.
Një diagnozë përpiqet ta japë “manifesti” me të cilin Der Spiegel njofton një ndryshim në linjën e tij editoriale: çdo javë, revista do të sjellë shembuj se si mund të trajtohen problemet e vjetra të vendit, në përpjekje për t’iu përgjigjur një ndjenje depresioni që prej muajsh rëndon mbi Gjermaninë.
Termi i përdorur është vërtet klinik: “Gjermania e duruar”, shkruan Der Spiegel, po vuan nga simptoma që karakterizojnë epokën.
Padurim: pas 16 vjetësh me të njëjtën kancelare, portreti zyrtar i së cilës, i ekspozuar në Berlin, tërheq vizitorë, elektorati gjerman rrëzoi një qeveri të qendrës së majtë pas vetëm tre vjetësh dhe tani duket i gatshëm të hedhë poshtë edhe kancelarin aktual të qendrës së djathtë.
Agresivitet: AfD-ja e ekstremit të djathtë kryeson sondazhet për zgjedhjet e ardhshme rajonale në Gjermaninë Lindore.
Pasiguri: pas dekadash stabiliteti të mbështetur te industria automobilistike, Volkswagen ka njoftuar shkurtimin e 100 mijë vendeve të punës, ndërsa BMW edhe 8 mijë të tjera.
Madje edhe futbolli, me Gjermaninë të mundur nga Paraguai në Kupën e Botës!, kontribuon, sipas Der Spiegel, në këtë krizë.
Si mund të zgjidhet?
Duke përdorur zgjidhje që janë provuar edhe në vende të tjera, shkruan Der Spiegel. Terapia provohet dhe, nëse pacienti ndihet më mirë, atëherë ajo është terapia e duhur./ “Corriere della Sera”
