Numri i udhëtarëve që mund të jenë prekur nga një variant i rrallë dhe vdekjeprurës i një sëmundjeje të quajtur hantavirus ka vijuar të rritet.
Shpërthimi i kësaj sëmundjeje pak të njohur, e cila zakonisht transmetohet nga brejtësit te njerëzit, nisi në mesin e prillit në një anije ekspedite turistike me flamur holandez, MV Hondius, e cila u nis nga Ushuaia, Argjentinë, më 1 prill. Që atëherë, të paktën tre persona nga 147 pasagjerët dhe anëtarët e ekuipazhit të anijes kanë humbur jetën dhe të paktën pesë të tjerë janë raportuar të sëmurë, sipas Organizatës Botërore të Shëndetësisë (OBSH).
Një rast i ri i dyshuar me hantavirus u raportua më 7 maj, kur një stjuardesë e kompanisë Royal KLM Dutch Airlines, e cila kishte pasur kontakt me një nga pasagjerët e infektuar të anijes turistike, u shtrua në spital në Amsterdam për analiza. Ende nuk është konfirmuar nëse ajo ka rezultuar pozitive me virusin.
Një operacion i madh monitorimi është në zhvillim për të ndjekur 30 pasagjerët e anijes që zbritën më 24 prill në ishullin Saint Helena në Atlantikun Jugor dhe u kthyen në shtëpi në 12 vende të ndryshme. Autoritetet shëndetësore të OBSH-së po identifikojnë aktualisht personat që mund të kenë qenë në kontakt me këta pasagjerë, përfshirë gjatë fluturimeve komerciale.
Edhe pse situata është shqetësuese dhe mund t’u kujtojë udhëtarëve anijet turistike që u vendosën në karantinë në fillim të pandemisë së COVID-19, zyrtarët thonë se publiku i gjerë nuk ka arsye për panik.
“Ky nuk është koronavirus”, tha Dr. Maria Van Kerkhove, drejtuese për gatishmërinë dhe parandalimin e epidemive dhe pandemive në OBSH, gjatë një konference për shtyp më 7 maj. “Ky është një virus shumë ndryshe. Nuk është fillimi i një pandemie si COVID. Kemi të bëjmë me një shpërthim në një anije. Nuk përhapet në të njëjtën mënyrë si koronaviruset.”
