Trigliceridet shpesh neglizhohen në krahasim me kolesterolin, por niveli i tyre i lartë mund të sinjalizojë rreziqe serioze për shëndetin, përfshirë sëmundjet e zemrës, diabetin e tipit 2 dhe mëlçinë e dhjamosur.
Ekspertët theksojnë se trigliceridet janë forma kryesore e yndyrës në trup dhe rriten kryesisht nga teprica e kalorive, sidomos nga sheqernat, ushqimet e përpunuara dhe alkooli. Kur mbeten të larta për një kohë të gjatë, ato mund të ndikojnë në ngushtimin e arterieve dhe rritjen e rrezikut për infarkt dhe goditje në tru.
Megjithatë, shumë persona vazhdojnë të besojnë disa mite të rrezikshme që lidhen me to:
Miti 1: Dieta pa yndyrë është zgjidhja kryesore
Në realitet, problemi shpesh qëndron te sheqeri dhe karbohidratet e rafinuara, jo vetëm te yndyrat.
Miti 2: Ushqimi bimor i ul automatikisht trigliceridet
Edhe dietat vegjetariane mund të rrisin trigliceridet nëse përfshijnë shumë ushqime të përpunuara dhe sheqer.
Miti 3: Vetëm LDL është i rëndësishëm
Edhe trigliceridet janë faktor kyç në vlerësimin e rrezikut kardiovaskular.
Miti 4: Trigliceridet e larta ndihen në trup
Në shumicën e rasteve nuk ka simptoma, prandaj zbulohen vetëm përmes analizave të gjakut.
Miti 5: Janë vetëm gjenetike dhe nuk ndryshohen
Stili i jetesës luan rol të madh dhe ndryshimet në ushqim e aktivitet fizik mund t’i ulin ndjeshëm.
Mjekët rekomandojnë reduktimin e sheqernave, alkoolit dhe ushqimeve të përpunuara, si dhe rritjen e aktivitetit fizik dhe konsumimin e ushqimeve të shëndetshme si perimet, peshku dhe vaj ulliri.
Sipas ekspertëve, kontrolli i rregullt i profilit lipidik mbetet mënyra më e sigurt për parandalimin e komplikimeve serioze shëndetësore.
