Shefi i Shtabit të Ushtrisë Izraelite, (IDF), gjenerallejtënant Eyal Zamir, u dërgoi një letër të pazakontë zyrtarëve qeveritarë, duke paralajmëruar për një krizë në rritje në radhët e ushtrisë dhe duke u bërë thirrje ligjvënësve të “përmbushin përgjegjësinë e tyre” duke avancuar legjislacionin urgjent për të mbështetur ushtarët e rregullt dhe rezervistë.
“Sfida qendrore me të cilën përballemi në fushatën aktuale është zgjerimi i misioneve të IDF-së”, shkroi Zamir, duke theksuar nevojën për të mbrojtur komunitetet kufitare, ndërkohë që eliminohen kërcënimet në mënyrë proaktive. Ai theksoi se ushtria duhet të jetë në gjendje të veprojë me iniciativë dhe ofensivë në shumë fronte.
Zamir paralajmëroi se një vendim për të shkurtuar shërbimin e detyrueshëm, pavarësisht kërkesës së tij të qartë gjatë vitit të kaluar për të zgjatur shërbimin e detyrueshëm, do të rezultonte në dëm serioz dhe një rënie në rendin e betejës së IDF-së, duke përfshirë një mungesë të mijëra ushtarëve luftarakë dhe personelit mbështetës.
“Çmimi i rëndë do të paguhet nga ushtarët rezervë dhe familjet e tyre, të cilët janë një aset jetësor i IDF-së“, shkroi ai.
Në letrën e tij, Zamir bëri thirrje për avancimin e menjëhershëm të tre ligjeve kryesore: një zgjatje të përkohshme të shërbimit të detyrueshëm, një ndryshim në kuadrin e detyrës rezerviste, të cilin ai tha se “nuk është i përshtatshëm në formatin e tij aktual” dhe një ligj të rishikuar për rekrutimin ushtarak në përputhje me nevojat operacionale të ushtrisë. Zamir paralajmëron se IDF duhet të rritet
“Në dritën e zgjerimit të misioneve në vitet e ardhshme dhe vendosmërisë së IDF-së për t’i kryer ato me përsosmëri, IDF duhet të rritet. Ne kemi nevojë për një ushtri të madhe dhe të fortë”, deklaroi ai.
Komentet vijnë së bashku me raportet e fundit se Zamir i paralajmëroi ministrat në një takim të kabinetit të sigurisë për një krizë të mundshme të fuqisë punëtore, duke thënë se po ngre flamuj të kuq për situatën.
