Një infermier i kujdesit paliativ në Gjermani është dënuar me burg të përjetshëm, pasi u shpall fajtor për vrasjen e 10 pacientëve dhe tentativën e vrasjes për 27 të tjerë. Identiteti i tij nuk është bërë publik.
Prokurorët thanë se ai injektoi pacientët, shumica të moshuar, me analgjezikë ose sedativë, për të lehtësuar punën gjatë turneve të natës. Krimet u kryen midis dhjetorit 2023 dhe majit 2024 në një spital në Wuerselen, në perëndim të Gjermanisë.
Infermieri, i cili kishte punuar në spital që nga viti 2020 pas përfundimit të trajnimit si profesionist i kujdesit shëndetësor në 2007, u arrestua në vitin 2024.
Prokurorët deklaruan në gjykatën e Aachen se ai tregonte mungesë empatie dhe irritim ndaj pacientëve që kërkonin kujdes më të madh, duke u përpjekur të “luante zotin e jetës dhe vdekjes” mbi ta. Ai injektoi pacientët me doza të mëdha morfine dhe midazolam, një sedativ, për të zvogëluar barrën gjatë turneve të natës.
Gjykata theksoi se krimet e tij kishin një rëndësi të veçantë të fajit, që e pengon lirimin e hershëm pas 15 vitesh. Infermieri ka të drejtë të bëjë apel ndaj vendimit.
Prokurorët kanë njoftuar se po kryhen hetime të thelluara për të identifikuar viktima të tjera potenciale, gjë që mund të çojë në një proces gjyqësor të ri kundër tij.
