Politico
Presidenti rus e ka lidhur mbijetesën e tij politike me një përballje të vazhdueshme me Amerikën dhe aleatët e saj.
Kur Vladimir Putin dërgoi të paktën 19 dronë në Poloni javën e kaluar, presidenti rus po jepte një mesazh: Ai nuk ka në plan ta përfundojë luftën e tij kundër Perëndimit së shpejti. Ndërhyrja ruse në hapësirën ajrore të NATO-s vjen pas javësh sulmesh ajrore në Ukrainë që vranë dhjetëra civilë, dëmtuan ndërtesat ku ndodhen delegacionet e BE-së dhe Britanisë së Madhe dhe goditën për herë të parë një ndërtesë qeveritare në qendër të Kievit.
Larg nga gatishmëria për të arritur një marrëveshje paqeje me Ukrainën nën presionin e Presidentit të SHBA-së, Donald Trump, Putin e ka lidhur mbijetesën e tij politike me një konflikt të zjarrtë me Shtetet e Bashkuara dhe aleatët e tyre.
“Putini është presidenti i luftës. Ai nuk ka interes ta përfundojë atë”, tha Nikolai Petrov, një analist i lartë në Qendrën e Strategjive të Reja Euroaziatike me seli në Londër.
Duke qenë se e ka modeluar veten si një udhëheqës në kohë lufte, rikthimi në rolin e presidentit në kohë paqeje do të ishte i barabartë me një ulje në detyrë.
“Pavarësisht kushteve, ai nuk mund ta heqë dorë nga ai rol”, tha Petrov.
Ndërsa sulmi në shkallë të plotë i Putinit ndaj Ukrainës po i afrohet vitit të katërt, presidenti rus ka ndoshta më shumë arsye për optimizëm që nga ditët e para të luftës, kur Kremlini shpresonte ta pushtonte vendin brenda pak ditësh.
Me forcat ukrainase të kufizuara nga mungesa e armëve dhe fuqisë punëtore, Rusia ka qenë duke u futur më thellë në vend. Por përparimi i Moskës ka qenë i ngadaltë dhe i kushtueshëm. Forcat e armatosura të Kremlinit kanë pësuar rreth një milion viktima dhe konflikti ka lënë gjurmën e tij në ekonominë ruse, e cila kërcënon të futet në recesion.
E megjithatë, politikisht, përfundimi i konfliktit vjen me rreziqe. Kontrolli i ngushtë i Kremlinit mbi median dhe internetin ka të ngjarë t’i lejojë atij t’ua shesë një marrëveshje paqeje shumicës së rusëve si një fitore. Por kjo nuk është ajo për të cilën do të shqetësohet presidenti rus.
Me opozitën liberale të Rusisë të shkatërruar, një grup i vogël, por i zëshëm nacionalistësh tani paraqet kërcënimin më të madh për sundimin e tij, tha Petrov. Dhe ai u ka premtuar atyre një fitore madhështore, jo vetëm mbi Ukrainën, por edhe mbi atë që Kremlini e quan “Perëndimi kolektiv”.
“Ekziston një dëshirë midis pjesës agresive të establishmentit ushtarako-politik për të shkatërruar NATO-n. Të tregosh se NATO është e pavlerë”, tha për shërbimin rus të DW-së Alexander Baunov, një ish-diplomat rus, tani bashkëpunëtor i lartë në Qendrën Carnegie Rusia-Eurasia.
Që kur Putini u takua me Trumpin në Alaska muajin e kaluar, në atë që presidenti amerikan e kishte cilësuar si një samit kushtuar arritjes së një armëpushimi, Moska ka intensifikuar fushatën e saj të luftës hibride kundër Evropës, sipas analistëve ushtarakë.
Përpara ndërhyrjes të së mërkurës, dronët rusë kishin hyrë vazhdimisht në hapësirën ajrore polake nga Bjellorusia fqinje, duke rrethuar qytetet përpara se të ktheheshin mbrapsht. Në gusht, një dron rus u rrëzua rreth 100 kilometra në jugperëndim të Varshavës.
Sipas WELT, një botim simotër i POLITICO në Axel Springer Group, pesë nga dronët që kaluan në Poloni ishin në një rrugë të drejtpërdrejtë fluturimi drejt një baze të NATO-s përpara se të interceptoheshin nga avionët luftarakë holandezë Lockheed Martin F-35.
Në një artikull opinioni të botuar dy ditë para se dronët të kalonin në Poloni, Dmitry Medvedev, zëvendëskryetar i Këshillit të Sigurisë së Rusisë, akuzoi Helsinkin për planifikimin e një sulmi, duke kërcënuar se çdo sulm “mund të çojë në shembjen e shtetësisë finlandeze – një herë e përgjithmonë”.
Analistët vunë në dukje se retorika e artikullit ngjante me pikat e diskutimit të Kremlinit përpara pushtimit të plotë të Ukrainës nga Rusia në shkurt të vitit 2022.
Moska ka filluar gjithashtu të zhvendosë industritë jetësore, përfshirë ndërtimin e anijeve, në lindje të vendit, larg kufirit të saj me NATO-n, theksoi Petrov. Të premten, Rusia filloi të kryejë ushtrime ushtarake në shkallë të gjerë me Bjellorusinë , duke përfshirë edhe ato përtej kufirit polak. Stërvitjet pritet të përfundojnë të martën.
“Çfarëdo që të arrijë Putini në Ukrainë, përballja me Perëndimin nuk do të mbarojë këtu; ajo do të vazhdojë në forma të ndryshme. Përfshirë edhe ushtarakisht”, tha Petrov.
Me veprime si ndërhyrja në Poloni, Putin po i lëshon një paralajmërim Trumpit dhe udhëheqësve evropianë që diskutojnë ofrimin e garancive të sigurisë për Kievin pas një marrëveshjeje të mundshme paqeje, tha Kirill Rogov, themelues i organizatës kërkimore Re:Russia .
“Putini tregoi se mund të sulmojë vendet e NATO-s sot dhe ato nuk kanë sisteme mbrojtëse”, shtoi ai.
Sinjalizimet e përziera të Trumpit mbi angazhimin e tij ndaj NATO-s dhe mosgatishmëria e tij për t’iu përmbajtur afateve të veta kur bëhet fjalë për vendosjen e sanksioneve ndaj Moskës, i japin Putinit besimin se mund t’ia dalë mbanë.
Për presidentin rus, është tani ose kurrë, shtoi Baunov. Sulme si ajo në Poloni kanë për qëllim të dobësojnë angazhimin e aleancës ushtarake perëndimore për mbrojtje kolektive, me ofensiva të vogla që vënë në provë gatishmërinë e NATO-s për t’u përgjigjur .
Shpresa, tha Baunov, është që aleanca ushtarake të zbulohet si një tigër pa dhëmbë. Deri më tani, reagimi nga Uashingtoni i ka ushqyer këto frikëra.
Të enjten, Trump përsëriti pikat e diskutimit të Moskës, duke u thënë gazetarëve se mund të ketë qenë një gabim.
Kremlini ka hedhur poshtë akuzat se dronët ishin një provokim i qëllimshëm. Ministria ruse e mbrojtjes tha se nuk kishte pasur plane për të synuar objekte në Poloni.
Bjellorusia, e cila shërbeu si pikë nisjeje për disa nga dronët sipas zyrtarëve polakë, tha se inkursioni mund të ketë qenë rezultat i një aksidenti për shkak të bllokimit elektronik.
“Kjo është një tallje dhe hetim tipik në stilin e Putinit. Atij i pëlqen që gjërat të jenë ambivalente në mënyrë që të mund të interpretohen ose si të qëllimshme ose aksidentale”, tha Rogov.
