Në një takim të “koalicionit të të vullnetshmëve”, presidenti i SHBA-ve, Donald Trump, ka kërkuar që Evropa të ndalojë plotësisht importin e naftës nga Rusia, raporton Reuters.
Sipas tij, të ardhurat nga shitja e naftës po financojnë drejtpërdrejt luftën e Moskës në Ukrainë.
Nga të dhënat e publikuara nga Shtëpia e Bardhë, vetëm gjatë vitit të kaluar Bashkimi Evropian i ka paguar Rusisë rreth 1.1 miliardë euro për naftë.
Trump gjithashtu u bëri thirrje aleatëve të rrisin presionin ndaj Kinës, të cilën e akuzoi për mbështetje ndaj Kremlinit.
Presidenti francez Emmanuel Macron theksoi se aktualisht vetëm dy shtete të BE-së vazhdojnë të blejnë naftë ruse: Hungaria dhe Sllovakia.
Ai ka thënë se Rusia duket se “po vepron me pëlqimin e shumë partnerëve të saj në të gjithë botën”, ndërsa po përpiqet të vonojë procesin e paqes dhe të vazhdojë të sulmojë Ukrainën.
Macron thekson nevojën për garanci sigurie për Ukrainën, ndërsa flet për procesin e udhëhequr nga shefat e mbrojtjes dhe planifikuesit që “hodhën themelet” për garancitë.
Sipas tij, garancitë tani janë gati, duke sqaruar angazhimin ushtarak dhe politik nga 35 anëtarët, për t’i siguruar Ukrainës mbështetjen që i nevojitet.
“Argumenti kryesor këtu është se nuk ka kufizime për mbrojtjen e Ukrainës”, thotë ai, duke theksuar nevojën për të “rigjeneruar” ushtrinë ukrainase për t’i “rezistuar” sulmeve ruse dhe për ta penguar atë nga planifikimi i një sulmi tjetër.
Ai thotë se 26 vende janë gati të përfshihen “në tokë, në det ose në ajër” për të “siguruar popullin e Ukrainës dhe për të ruajtur armëpushimin pasi të zbatohet, si dhe për të ruajtur dhe garantuar paqen”.
Macron konfirmon gjithashtu se udhëheqësit folën me Presidentin amerikan Donald Trump.
Ai thotë se “përfundimet janë shumë të thjeshta”, me plane për të finalizuar mbështetjen e dakorduar të SHBA-ve në ditët në vijim.
Macron shton se “ne jemi gjithashtu të gatshëm të koordinojmë përpjekjet tona në mënyrë që të ndalojmë përpjekjet e luftës nga Rusia”.
Ai thotë se evropianët duan një seri takimesh për ta çuar luftën në fund, dhe “nëse Moska nuk dëshiron t’i respektojë këto kushte, ne do të duhet të ndërmarrim hapa të mëtejshëm me SHBA-të”.
Ai pretendon se Trump ka konfirmuar se do t’i bashkohet koalicionit për të ndërmarrë veprime nëse Rusia nuk vepron.
“Ne nuk mund të lejojmë që të shkelet ligji ndërkombëtar. Nuk mundemi, sepse kjo nuk është vetëm Ukraina; kjo është siguria e të gjithëve ne”.
