Presidenti amerikan Donald Trump u ka thënë donatorëve vitin e kaluar se kishte paralajmëruar presidentin rus Vladimir Putin dhe presidentin kinez Xi Jinping se do të bombardonte kryeqytetet e tyre, nëse Rusia do të pushtonte Ukrainën dhe Kina Tajvanin.
Kjo deklaratë vjen nga një incizim audio i siguruar nga NBC News, dhe është përfshirë në një libër të ri mbi garën presidenciale të vitit të kaluar.
Trump ka pretenduar vazhdimisht gjatë fushatës së tij zgjedhore se pushtimi i plotë i Ukrainës nga Rusia në vitin 2022 nuk do të kishte ndodhur kurrë nëse ai do të ishte president në atë kohë, duke ia hedhur fajin ish-Presidentit Joe Biden.
Ai më parë shërbeu si president nga viti 2017 deri në vitin 2021, gjatë së cilës kohë Rusia tashmë e kishte pushtuar Krimenë dhe kishte zhvilluar luftë kundër Ukrainës në Donbas.
Ndërsa fillimisht u zotua të ndërmjetësonte një marrëveshje të shpejtë paqeje midis Kievit dhe Moskës dhe u mburr me lidhje të ngrohta me Putin, Trump kohët e fundit ka miratuar një ton më kritik ndaj udhëheqësit rus, ndërsa bisedimet e paqes ngecin dhe sulmet ajrore ruse përshkallëzohen.
“Putin bën shumë budallallëqe”, tha Trump gjatë një takimi të kabinetit më 8 korrik.
Presidenti i SHBA-ve sinjalizoi gjithashtu mbështetje për një projektligj të madh sanksionesh të Senatit kundër Rusisë dhe, siç thuhet, furnizimet e mbrojtjes ajrore për Ukrainën.
Këto zhvillime bien ndesh me një ndalesë të kohëve të fundit nga Pentagoni në dërgesat e ndihmës ushtarake, duke përfshirë interceptorët Patriot, që shkojnë drejt Ukrainës, dhe me ngurrimin e mëparshëm të Trump për të ushtruar presion shtesë ndaj Moskës.
Forcat ruse vazhdojnë të përshkallëzojnë sulmet ajrore në qytetet ukrainase, duke goditur së fundmi qytetin perëndimor të Lutsk dhe zona të tjera gjatë natës së 9 korrikut.
Kievi u ka kërkuar partnerëve të tij perëndimorë të rrisin mbështetjen, përkatësisht në aspektin e sanksioneve dhe sigurimit të mbrojtjes së re ajrore.
