Shefi i Shtabit të Përgjithshëm të ushtrisë izraelite, Eyal Zamir, ka paralajmëruar se konflikti me të cilin po përballet Izraeli mund të zgjasë për një kohë të gjatë. Deklarata e tij u bë publike përmes një videoje të shpërndarë nga Forcat e Mbrojtjes së Izraelit (IDF).
Gjatë një fjalimi drejtuar oficerëve të ushtrisë, Zamir theksoi se situata e sigurisë në vend mbetet e ndërlikuar dhe se Izraeli duhet të përgatitet për një periudhë të zgjatur tensioni dhe operacione ushtarake.
“Izraeli ndodhet prej dy vitesh në një gjendje emergjence. Duhet të presim që kjo situatë të zgjasë edhe për një kohë të gjatë dhe duhet të tregojmë durim”, u shpreh ai.
Sipas tij, ushtria izraelite duhet të mbetet e përgatitur për sfida të vazhdueshme në rajon, ndërsa tensionet dhe përplasjet ushtarake vijojnë të mbeten të larta.
“Kjo është lufta e brezit tonë. Është një luftë kritike, një luftë vendimtare. Kjo luftë do të përcaktojë të ardhmen dhe sigurinë tonë këtu për shumë vite që do të vijnë”, theksoi Zamir.
Deklarata e Zamir vjen në një moment kur situata e sigurisë në Lindjen e Mesme mbetet e tensionuar, ndërsa autoritetet izraelite paralajmërojnë se konflikti aktual mund të mos përfundojë në një afat të shkurtër.
