Shtetet e Bashkuara kanë shpallur organizata terroriste disa degë të Vëllazërisë Myslimane në Lindjen e Mesme, në kuadër të angazhimit të administratës së Presidentit Donald Trump për të eliminuar kapacitetet dhe aktivitetet e grupeve që paraqesin kërcënim për sigurinë amerikane.
Lajmi u bë i ditur nga Sekretari i Shtetit, Marco Rubio, i cili deklaroi se Departamenti i Shtetit ka shpallur Vëllazërinë Myslimane të Libanit si Organizatë Terroriste të Huaj, si edhe si Terroriste Globale e Përcaktuar në mënyrë të Veçantë (SDGT). Po ashtu, si SDGT është shpallur edhe udhëheqësi i saj, Muhammad Fawzi Taqqosh.
Ndërkohë, Departamenti i Thesarit ka shpallur Vëllazërinë Myslimane të Egjiptit dhe të Jordanisë si SDGT, me arsyetimin se këto struktura kanë ofruar mbështetje materiale për Hamasin.
Sipas Rubio-s, këto vendime përbëjnë hapat e parë të një fushate të vazhdueshme dhe të qëndrueshme për të penguar dhunën dhe destabilizimin e shkaktuar nga degët e Vëllazërisë Myslimane, kudo që ato veprojnë.
“Shtetet e Bashkuara do të përdorin të gjitha mjetet në dispozicion për t’u mohuar këtyre grupeve burimet që u mundësojnë përfshirjen ose mbështetjen e terrorizmit”, thuhet në deklaratën zyrtare.
Vendimi bazohet në Urdhrin Ekzekutiv 14362, i cili synon goditjen e rrjeteve që kërcënojnë interesat dhe sigurinë e SHBA-ve, si dhe stabilitetin rajonal.
