Forcimi i Lekut në kursin e këmbimit valutor ka mbrojtur ekonominë shqiptare nga inflacioni i jashtëm dhe ka mundësuar norma më të ulëta interesi, duke nxitur kreditimin e ekonomisë.
Guvernatori i Bankës së Shqipërisë, Gent Sejko, tha sot në konferencën e përbashkët për shtyp me Shefen e Misionit të FMN-së dhe Ministrin e Financave, se forcimi i kursit të këmbimit ka ndihmuar në ribalancimin e sektorit të jashtëm të ekonomisë dhe në frenimin e transmetimit të inflacionit të huaj në tregun vendas, duke bërë të mundur edhe një kurs më akomodues të politikës monetare.
Rritja e eksportit të shërbimeve ka amortizuar rënien e eksportit të mallrave dhe rritjen e importeve, duke konsoliduar përmirësimet strukturore në bilancin e pagesave dhe duke vijuar të ushtrojë presion në kahun forcues të kursit të këmbimit. Normat e ulëta të interesit në tregun vendas kanë nxitur dhe vazhdojnë të ushqejnë një rritje relativisht të shpejtë të kredisë, rritje, e cila ka mbështetur zgjerimin e konsumit dhe të investimeve në vend.
“Gjej me vend të nënvizoj se dy shtyllat kryesore të regjimit tonë monetar: inflacioni i shënjestruar dhe kursi i lirë i këmbimit, na kanë krijuar fleksibilitetin e duhur në përballimin e goditjeve,” tha Sejko.
Ai theksoi edhe njëherë se parashikimet e bankës së Shqipërisë për të ardhmen mbeten pozitive.
“Në vija të përgjithshme, projeksionet tona sugjerojnë se ekonomia shqiptare do të vijojë të rritet në horizontin afatmesëm, me ritme të përafërta me ato të vitit aktual. Në gjykimin tonë, këto ritme rritjeje do të mundësojnë një shfrytëzim të mirë të burimeve prodhuese të vendit, duke krijuar hapësira për kthimin e inflacionit në objektiv në gjysmën e parë të vitit 2026 dhe stabilizimin e tij rreth nivelit 3% në vitet pasuese.
Banka e Shqipërisë gjykon se projeksionet për një ecuri të balancuar të kërkesës dhe ofertës në ekonomi, diktojnë edhe nevojën e një kuadri të balancuar dhe neutral të politikave makroekonomike. Në këtë kontekst, dua të theksoj se angazhimi i politikës fiskale për të vijuar procesin e konsolidimit të deficitit buxhetor e të borxhit publik, si dhe regjimi i lirë i kursit të këmbimit, i krijon më shumë hapësira politikës monetare të reagojë në kohën dhe në kahun e duhur për kontrollin e inflacionit dhe stabilizimin e ekonomisë,” u shpeh Guvernatori.
Ai shtoi se Banka e Shqipërisë do të vijojë të punojë për konvergjencën e mëtejshme të kuadrit mbikëqyrës e rregullator me standardet e BE-së dhe praktikat më të mira të fushës.
“Vijimi i realizimit të detyrave tona në kuadrin e procesit të integrimit, si dhe programi i vlerësimit të qëndrueshmërisë së sistemit financiar shqiptar (FSAP), i cili do të zhvillohet vitin tjetër në bashkëpunim me FMN-në dhe BB-në, do të na japë një udhërrëfyes të mirë për reformat e mëtejshme që duhet të ndërmarrim.
Banka e Shqipërisë do të vijojë të mbetet e përkushtuar në respektimin e objektivit të saj primar: atë të ruajtjes së stabilitetit të çmimeve, si dhe në përmbushjen e të gjitha detyrave të tjera të saj, në kuadrin e stabilitetit financiar, të zhvillimit të tregjeve financiare dhe të sistemeve të pagesave, si dhe në procesin e negociatave për integrimin e Shqipërisë në BE. Gjithashtu, ne do të vijojmë të ofrojmë ekspertizën tonë në fushën e reformave strukturore të nevojshme për një rritje sa më të shpejtë, më të qëndrueshme dhe më gjithëpërfshirëse ekonomike,” tha Sejko.
