Rusia mbetet e gatshme të veprojë si ndërmjetëse në konfliktin midis Izraelit dhe Iranit, dhe propozimet e mëparshme të Moskës për të grumbulluar uranium iranian në Rusi mbeten në tryezë, tha Kremlini. Propozimet e mëparshme të Rusisë për zgjidhjen e konfliktit janë ende në tryezë, por sulmet e ndërsjella midis dy vendeve e kanë komplikuar situatën, tha zëdhënësi i Kremlinit, Dmitry Peskov. Presidenti i SHBA-së, Donald Trump, tha në një intervistë për ABC News të dielën se është i hapur ndaj mundësisë që Presidenti rus, Vladimir Putin, të marrë rolin e ndërmjetësit midis Izraelit dhe Iranit. Meqenëse Moska mban lidhje me të dy vendet, mbeten pyetje se si Rusia mund të përfshihet në konflikt.
Partneritet strategjik
Moska në prill ratifikoi një marrëveshje partneriteti strategjik me Iranin që përfshin dispozita për të dy vendet për t’iu kundërvënë kërcënimeve të përbashkëta, por më e rëndësishmja nuk krijon asnjë lloj aleance ushtarake midis dy vendeve. “Nënshkrimi i traktatit nuk do të thotë krijimi i një aleance ushtarake me Iranin apo ndihmë të ndërsjellë ushtarake”, tha zëvendësministri i Jashtëm rus Andrei Rudenko në një fjalim para Dumës Shtetërore në atë kohë. Hanna Notte, një eksperte për Rusinë dhe Lindjen e Mesme në Qendrën për Studime të Mospërhapjes së Armëve Bërthamore, shkroi në X se Rusia ka të ngjarë të përpiqet të përfshihet përmes organeve ndërkombëtare, siç janë Këshilli i Sigurimit i OKB-së dhe Agjencia Ndërkombëtare e Energjisë Atomike (IAEA).
Ndërmjetësimi
Notte vuri në dukje gjithashtu se Rusia ka të ngjarë të vazhdojë të përpiqet të luajë rolin e ndërmjetësit në konflikt, duke pasur parasysh dëshirën e saj për të mbetur një lojtar me ndikim në çështjet rajonale dhe globale. Të premten, Vladimir Putin ofroi Rusinë si ndërmjetës në telefonatën e tij me kryeministrin izraelit Benjamin Netanyahu. Megjithatë, suksesi diplomatik për Rusinë është larg të qenit i garantuar, shkroi Notte në Foreign Affairs më parë këtë vit. “Trubulencat në Lindjen e Mesme kanë rezultuar shumë intensive dhe të paparashikueshme që Moska të mund t’i drejtojë me siguri në një drejtim të favorshëm.” Ruslan Suleymanov, një bashkëpunëtor kërkimor jo-rezident në Institutin për Zhvillim dhe Diplomaci në Universitetin ADA në Baku, e mbështeti këtë mendim. “Besueshmëria e Rusisë në rajon u minua vitin e kaluar kur Putin tregoi dobësinë e tij, ndërkohë që nuk e mbështeti Bashar al-Assad-in në luftën e tij me xhihadistët. Putin e ka bërë të qartë se nuk është më i besueshëm”, tha Suleymanov për The Moscow Times.
Ndikimi në ekonomi
Një konfrontim i zgjatur midis Iranit dhe Izraelit mund të çojë në një rritje të çmimeve globale të energjisë, gjë që do të siguronte një nxitje afatshkurtër për të ardhurat buxhetore të Rusisë. Komplikimet në arritjen e një marrëveshjeje mbi programin bërthamor iranian mund ta ndihmojnë gjithashtu Moskën duke vonuar më tej hyrjen e naftës dhe gazit iranian në tregjet globale – dhe në veçanti në ato evropiane. Përshkallëzimi i tensioneve midis Iranit dhe Izraelit e rriti çmimin e naftës Brent me gati 10% të hënën krahasuar me javën e kaluar, nga 67 dollarë për fuçi në 73.60 dollarë për fuçi. Sulmet ajrore izraelite që synojnë infrastrukturën energjetike iraniane, siç janë impiantet e përpunimit të gazit, mund të kufizojnë prodhimin e naftës dhe gazit të Iranit, i cili furnizon kryesisht me gaz vendet fqinje si Turqia dhe Iraku, dhe me naftë Kinën. E megjithatë, për ekonominë ruse, e cila mbështetet në të ardhurat nga gazi dhe nafta si burim të ardhurash nga valuta e huaj dhe taksat për qeverinë, përballja mund të ketë disa përfitime ekonomike afatshkurtra. Mungesat e shkaktuara nga ndërprerjet do të ndihmonin në rritjen e të ardhurave ruse nga nafta.
