Prokuroria e Tetovës është në pritje të vendimit zyrtar nga ana e gjykatësit të lëndës së spitalit modularit, ku dy ish drejtorët Florin Besimi dhe Artan Etemi, u dënuan me burg efektiv prej 18 muajsh, ndërsa spitali si person juridik u dënua me një milion denarë. Pas arritjes së vendimit me shkrim, nga prokuroria thonë se një ekip i veçantë do të shqyrtojë mundësinë e ankimimit ose jo të vendimit në Gjykatën e Apelit.
Lënda në prokurori duhet të arrijë brenda afatit të paraparë ligjor, thotë gjykatësi i lëndës, Rexhep Musa, ndërsa ligjërisht për lëndët më të vështira, gjykatësit kanë afat nga 15 deri në 60 ditë për dorëzimin e të njëjtës.
Meqë për akuzën në fjalë, dënimi me burg parasheh nga gjashtë muaj deri në 5 vite burg efektiv, të mëdha janë gjasat që prokuroria e Tetovës të bëj ankesë, për të kërkuar dënimin maksimal për të akuzuarit.
Meqë lënda një herë është kthyer nga Gjykata e Apelit, kësaj radhe nuk pritët më të kthehet e njëjta, por vetëm se do të bëhet korrigjimi eventual i dënimit, edhe atë duke u ulur i njëjti apo duke u rritur, marrë për bazë se dënimi ishte për shkaktim të rrezikut nga pakujdesia.
Ankesë paralajmëruan edhe familjarët e viktimave. U shprehën të pakënaqur nga vendimi i gjykatësit Rexhepi.
“Ne si familjarë nuk jemi të kënaqur me vendimin. Ne e kemi thënë dhe do e them, në rastin e spitalit duhej të ishin të akuzuar edhe Ministri i Shëndetësisë, Filipçe, Angjushev, BRAKO, instaluesi i rrymës sepse e gjitha që ndodhi në spital siç e kam pa unë që isha në dhomë atë natë ishte rryma. Ne si familjarë do bëjmë ankesë më tutje, nuk jemi të kënaqur”, tha Mumin Ismaili, Familjar.
Të pakënaqur nga vendimi u shprehën edhe ish drejtori i spitalit klinik të Tetovës Florin Besimi i cili paralajmëroi ankimim të lëndës në Apel, bashkë me Spitalin klinik si person juridik, i cili u dënua me një milion denarë.
“Ky vendim është pasojë e konstatimit të gabuar të gjendjes faktike dhe interpretimit të gabuar të Ligjit për procedurë penale dhe Kodit penal. Kundër këtij vendimi ne në kohë do të bëjmë ankesë në Gjykatën e Apelit”, tha Valon Abdylhamiti, Avokat i Spitalit klinik.
Por përveç për këtë rast, familjarët e viktimave dhe opinioni kërkon epilog për hetimin tjetër që e udhëheq Prokuroria për ndjekjen e krimit të organizuar i cili ka të bëjë me zbulimin e shkaqeve të zjarrit. Por edhe pse kanë kaluar tashmë tre vite e gjysmë, lënda vazhdon të jetë në fazën para hetimore./Alsat.mk
