Shqipëria ka ndërmarrë hapa të rëndësishëm në forcimin e kapaciteteve të saj mbrojtëse, duke nënshkruar dy marrëveshje strategjike me partnerë kyç në fushën e sigurisë si Izraeli dhe Turqia.
Autoritetet shqiptare kanë arritur një ekuilibër të pazakontë me dy vende që aktualisht mbajnë raporte mjaft të tensionuara, pas përshkallëzimeve të konfliktit në Gaza dhe tensioneve ushtarake në Siri.
Në fillim të korrikut, Këshilli i Ministrave miratoi në parim marrëveshjen kuadër me Qeverinë e Izraelit, e cila është nënshkruar ndërmjet Ministrisë së Mbrojtjes së Shqipërisë dhe homologes izraelite.
Kjo marrëveshje synon të rrisë kapacitetet mbrojtëse të Shqipërisë, në përputhje me standardet më të larta ndërkombëtare, dhe të avancojë bashkëpunimin strategjik me një nga partnerët më të zhvilluar ushtarakisht në rajon.
Sipas vendimit të publikuar, marrëveshja hyn menjëherë në fuqi dhe hap rrugën për projekte të përbashkëta, si dhe shkëmbime teknologjike në dobi të sigurisë kombëtare.
Në të njëjtën kohë, Shqipëria ka forcuar marrëdhëniet edhe me aleatin tjetër strategjik – Turqinë.
Gjatë Panairit Ndërkombëtar të Industrisë së Mbrojtjes (IDEF 2025), të mbajtur në Stamboll, ministri i Mbrojtjes Pirro Vengu nënshkroi një marrëveshje për ndihmë monetare me homologun e tij turk, Yasar Guler.
Sipas Ministrisë së Mbrojtjes, protokolli i ri do të mundësojë pajisjen e forcave shqiptare me sisteme artilerie 105 mm dhe njëkohësisht do të zgjerojë mbështetjen turke përfshirë trajnime, logjistikë, transport dhe ndihmë institucionale.
Në komentet e tij zyrtare gjatë vizitës në IDEF, ministri Vengu theksoi synimin e qeverisë për të zhvilluar industrinë e mbrojtjes në vend, duke e kthyer atë në një sektor të qëndrueshëm dhe konkurrues të ekonomisë kombëtare.
Ai konfirmoi se Shqipëria është e hapur për bashkëpunim me kompani turke të mbrojtjes për projekte të bashkëprodhimit dhe transferimi teknologjie.
Një tjetër zhvillim i rëndësishëm lidhet me interesin në rritje të kompanive të huaja për të investuar në industrinë shqiptare të mbrojtjes.
Ministri Vengu ka bërë të ditur se janë në negociata gjashtë kompani të huaja për të prodhuar pajisje ushtarake në Shqipëri, përfshirë armë të lehta, municion, automjete të blinduara dhe uniforma.
Nga 25 kompani që kanë shprehur interes, disa prej tyre kanë seli në SHBA dhe Izrael.
Kompania izraelite Elbit Systems Ltd., një nga gjigantët globalë të teknologjisë së mbrojtjes, ka firmosur një memorandum bashkëpunimi me autoritetet shqiptare në prill.
Sipas burimeve të Albanian Post, Elbit do të angazhohet për montimin e dronëve dhe për prodhimin e armatimit të lehtë e artilerisë së rëndë në ish-Uzinën e Bakrit në Rubik, e cila do të shndërrohet në një qendër prodhimi për Forcat e Armatosura.
Ndërsa të dy partneritetet – me Izraelin dhe Turqinë – kanë elementë të ndryshëm në fokusin e tyre, ato kanë një qëllim të përbashkët: të rrisin kapacitetin ushtarak dhe të nxisin zhvillimin e industrisë vendase të mbrojtjes.
Përveç Shqipërisë, vetëm Azerbajxhani ruan aktualisht marrëdhënie të ngushta dhe aktive në fushën e mbrojtjes me të dy vendet njëherazi – Izraelin dhe Turqinë.
Kjo e bën Shqipërinë një rast unik në Ballkan, duke sinjalizuar një orientim më ambicioz dhe të pavarur në fushën e mbrojtjes.
Në muajin e fundit, qeveria shqiptare ka treguar se nuk e sheh sigurinë vetëm si një çështje ushtarake, por edhe si një mundësi zhvillimi industrial dhe teknologjik.
Angazhimet e njëkohshme mbrojtëse të Shqipërisë me Izraelin dhe Turqinë nuk janë vetëm të rralla, por edhe strategjikisht ambicioze.
Nëpërmjet marrëveshjeve të nivelit të lartë, transferimeve të armëve dhe teknologjisë, si dhe partneriteteve industriale, Shqipëria po përparon aftësitë e saj mbrojtëse, duke ruajtur njëkohësisht shkathtësinë diplomatike – një qasje që pak shtete në Ballkan e arrijnë.
