Kreu i Agjencisë së OKB-së për Refugjatët Palestinezë (UNRWA) ka deklaruar këtë të martë, më 22 korrik, se punonjësit e saj, mjekë dhe punonjës humanitarë, po u bie të fikët gjatë detyrës për shkak të urisë dhe rraskapitjes.
Komisioneri i përgjithshëm i UNRWA-së, Philippe Lazzarini, deklaroi në një komunikatë, të shpërndarë nga zëdhënësi i tij gjatë një konference për shtyp në Gjenevë se: “Kujdestarët, përfshirë kolegët tanë të UNRWA-së në Gaza, kanë tani vetë nevojë për përkujdesje. Mjekët, infermierët, gazetarët, punonjësit humanitarë, përfshirë edhe stafin tonë, janë të uritur. Shumë prej tyre po u bie të fikët nga uria dhe rraskapitja teksa kryejnë detyrat e tyre.”
Lazzarini e përshkroi situatën në Gaza si “ferr mbi tokë”, duke shtuar se askund nuk është e sigurt.
The Guardian shkruan se sipas vlerësimeve të UNRWA-së, rreth 1 mijë njerëz të uritur janë vrarë që nga fundi i majit, ndërsa përpiqeshin të gjenin ndihma ushqimore.
Pas dështimit të bisedimeve për zgjatjen e një armëpushimi gjashtë-javor, Izraeli vendosi një bllokadë të plotë mbi Gazën më 2 mars, duke mos lejuar futjen e asgjëje deri në fund të majit, kur lejuan në mënyrë shumë të kufizuar kamionë me ndihma.
Në një postim në rrjetin X të hënën, UNRWA tha se mungesat në territorin palestinez kanë bërë që çmimet e ushqimeve të rriten deri në 40 herë, ndërsa ndihmat e magazinuara jashtë Gazës do të mjaftonin për të ushqyer gjithë popullsinë për më shumë se tre muaj.
