Universiteti i Tetovës sot e zhvilloi me sukses provimin pranues për kandidatët që kanë konkurruar në afatin e parë të regjistrimit. Qindra maturantë u testuan për t’u bërë pjesë e një prej 13 fakulteteve të këtij institucioni të arsimit të lartë, duke treguar interes të veçantë për programet studimore që ofron UT.
Provimi pranues u organizua nën mbikëqyrjen e komisioneve profesionale, duke respektuar të gjitha kriteret e përcaktuara në konkursin publik. Nga Komisioni për pranimin e studentëve u theksua se transparenca dhe barazia e kandidatëve kanë qenë prioritet gjatë gjithë procesit.
Rezultatet paraprake do të shpallen të hënën, më 1 shtator 2025, ndërsa regjistrimi i studentëve të pranuar do të zhvillohet sipas afateve të përcaktuara në konkurs.
