Ministri izraelit i Çështjeve të Diasporës, Amichai Chikli, bën thirrje drejtpërdrejt që Presidenti sirian Ahmed al-Sharaa të “eliminohet pa vonesë”, në postimet në anglisht dhe hebraisht në llogarinë e tij në median sociale X.
Pas njoftimit të Izraelit këtë mëngjes se do të godasë objektivat e regjimit sirian në përgjigje të sulmeve të raportuara kundër popullsisë druze nga forcat e Sharaa-s, Chikli shkruan: “Kushdo që mendon se Ahmad al-Sharaa është një udhëheqës legjitim gabon rëndë – ai është një terrorist, një vrasës barbar që duhet të eliminohet pa vonesë”.
Duke ndarë pamjet që qarkullojnë në internet që duket se tregojnë forcat e ushtrisë siriane duke u tallur dhe sulmuar anëtarë të komunitetit druze duke ua rruar me forcë qimet e fytyrës, Chikli shton në hebraisht: “Nëse duket si Hamas, flet si Hamas dhe vepron si Hamas – është Hamas!” – duke krahasuar sjelljen e supozuar të trupave siriane me atë të grupit militant me bazë në Gaza.
“Nuk duhet të qëndrojmë duarkryq përballë regjimit terrorist islamisto-nazist të Al-Qaedas me kostum dhe kravatë”, vazhdon ministri. “Pamë masakrën e tmerrshme të alavitëve, hasëm në heshtje shurdhuese nga udhëheqësit evropianë dhe tani po dëshmojmë masakrën dhe poshtërimin e druzëve”.
“Regjimi terrorist në Siri duhet të luftohet”, thotë ai.
Më 6 korrik, Chikli i dërgoi një letër zyrtare kryeministrit Benjamin Netanyahu, duke shprehur kundërshtimin e tij ndaj një marrëveshjeje të pjesshme me Hamasin për lirimin e pengjeve dhe çdo ide për paqe me regjimin e Sharaa-s në Siri.
Në letër, ai paralajmëronte se marrëveshja e re me Hamasin është “problematike”, pasi lejon rindërtimin e forcave të grupit militant, ndërkohë që mban ende të paktën 10 pengje të gjallë në duart e tij.
“Nuk ka vend për një marrëveshje të pjesshme. Çdo marrëveshje tani duhet të përfshijë çarmatosjen e Hamasit, kthimin e të gjithë pengjeve pa përjashtim, dhe kontroll të përhershëm të zonave kyçe në veri dhe jug të Gazës”, shkruante ai.
Për presidentin sirian al-Sharaa, Chikli ishte po aq i prerë: “Është e ndaluar të bëhet paqe me këtë terrorist. Ai po kërkon një hudna — një armëpushim të përkohshëm – sepse është në pozitë të dobët dhe kërkon kohë për t’u forcuar”.
