Ushtria kanadeze, zhvillon simulimin e një pushtimi amerikan...Në një zhvillim që ka tronditur opinionin publik dhe ka trukuar radarët diplomatikë ndërkombëtarë, ushtria kanadeze ka zhvilluar një simulim të një pushtimi të mundshëm nga Shtetet e Bashkuara, duke analizuar përgjigjet strategjike të mundshme të Otavës ndaj një sulmi të befasishëm nga jugu.
Sipas një raporti ekskluziv të gazetës The Globe and Mail, ky është rasti i parë në më shumë se një shekull që forcat kanadeze marrin seriozisht në konsideratë një kërcënim të tillë hipotetik nga një aleat historik, duke shënuar një pikë kthese të paprecedentë në mendimin strategjik të vendit.
Burime të larta qeveritare kanë sqaruar se nuk bëhet fjalë për një plan operacional, por për një ushtrim teorik, që përdoret për të testuar gatishmërinë dhe për të stimuluar mendimin strategjik në rast të një skenari ekstrem. Megjithatë, fakti që një aleat i NATO-s si Kanadaja shqyrton realisht mundësinë e një konflikti me SHBA-në, flet shumë për klimën e re të pasigurisë gjeopolitike në Amerikën e Veriut.
Ky ushtrim i ushtrisë kanadeze përkon me retorikën gjithnjë e më provokuese të Donald Trump, i cili, pas rikthimit në Shtëpinë e Bardhë, ka ripërsëritur publikisht se e dëshiron Kanadanë si shtetin e 51-të të SHBA-së.
Në një tjetër provokim të natës mes së hënës dhe të martës, Trump publikoi në rrjetin Truth Social një imazh të krijuar me inteligjencë artificiale, ku shfaqet në Zyrën Ovale me liderët evropianë përpara një harte ku flamuri amerikan mbulon jo vetëm SHBA-në, por edhe Kanadanë, Groenlandën dhe Venezuelën.
Sipas analizave të ushtrisë kanadeze, në rast të një ndërhyrjeje nga jugu, forcat amerikane do të ishin në gjendje të neutralizonin pikat kyçe strategjike të Kanadasë brenda dy deri në shtatë ditë. Në këtë rast, përgjigja e Otavës do të përfshinte një formë rezistence të brendshme me taktika guerile dhe veprime të ngjashme me luftën në Afganistan.
Ironikisht, Kanadaja është jo vetëm anëtare themeluese e NATO-s, por edhe partnere e SHBA-së në mbrojtjen ajrore kontinentale nëpërmjet komandës së përbashkët NORAD (Komanda e Mbrojtjes Ajrore të Amerikës së Veriut).
Por në epokën Trump, edhe aleatët tradicionalë ndihen të pasigurt dhe fillojnë të përgatiten për skenarë që deri dje duken të pamundur. Dhe kur kërcënimi potencial vjen nga aleati më i afërt historik, çdo linjë e kuqe ndërkombëtare fillon të zbehet.
