Udhëheqësi i ri suprem i Iranit, Mojtaba Khamenei, ka financuar blerjen e disa pronave luksoze në Londër përmes një kredie të dhënë nga një kompani investimi e themeluar nga biznesmenë britaniko-izraelitë, sipas një hetimi të publikuar nga Shomrim dhe Konsorciumi Ndërkombëtar i Gazetarëve Investigativë (ICIJ). Lajmin e raportoi Shir Perets.
Sipas hetimit, kredia prej rreth 36 milionë paundësh u dha në vitin 2013 nga grupi britanik i investimeve TOPLAND, i themeluar nga vëllezërit izraelitë Sol dhe Eddie Zakai.
Raporti thotë se financimi u realizua përmes një kompanie të regjistruar në Ishullin e Manit, një juridiksion me regjim të favorshëm fiskal. Në kohën e transaksionit nuk kishte sanksione që ndalonin përfshirjen e palëve në këtë marrëveshje financiare.
Sipas të njëjtit hetim, Khamenei besohet se kontrollon një rrjet pasurish me vlerë të paktën 3 miliardë dollarë në Britani, Emiratet e Bashkuara Arabe dhe disa vende të tjera evropiane, përveç Iranit. Megjithatë, këto asete nuk rezultojnë të regjistruara në emrin e tij në dokumentet zyrtare të pronësisë.
Hetimi identifikon biznesmenin iranian Ali Ansari si një nga personat kyç që menaxhon blerjet e pronave dhe investimet e lidhura me Khamenein.
Autoritetet britanike vendosën sanksione ndaj Ansarit në tetor të vitit të kaluar dhe ngrinë asetet e tij. Gjermania dhe Kanadaja gjithashtu kanë hapur hetime ndaj tij pas një raporti të mëparshëm të Bloomberg, i cili analizonte marrëdhëniet e tij të mundshme me regjimin iranian.
Ansari i ka kundërshtuar këto pretendime dhe ka deklaruar se nuk ka lidhje me Mojtaba Khamenein.
