Shkup – Qeveria do të marrë hua mbi një miliard euro. Plani është që 950 milionë eurot të sigurohen përmes një euroobligacion në vitin e ardhshëm, ndërsa rreth 70 milionë euro të jenë kredi nga bankat vendase. Nga Ministria e Financave thonë se paratë do të përdoren edhe për nevojat e deficitit buxhetor, ndërsa huamarrja është në përputhje me buxhetin dhe bilancin plotësues për këtë vit.
Ministrja e Financave, Gordana Dimitrieska-Koçoska, njoftoi një muaj më parë se tashmë po bëhen përgatitjet për emetimin e një euroobligacioni të ri për vitin e ardhshëm, me qëllim sigurimin e fondeve për servisimin e euroobligacionit që maturohet në vitin 2026, i cili është në shumën prej më shumë se 700 milionë eurosh.
Sipas saj, e financuam pjesën më të madhe të Buxhetit të vitit 2025 përmes bankave vendase, por tani është koha të drejtohemi drejt tregjeve financiare ndërkombëtare. Në fakt, qeveria në njërën nga seancat e saj të fundit të mbajtura më 1 gusht të këtij viti, shqyrtoi informacionin mbi huamarrjen e Maqedonisë nga bankat vendase dhe huamarrjen potenciale në tregun ndërkombëtar të kapitalit. Mundësia e huamarrjes së re po shqyrtohet në një kohë kur borxhi publik i vendit tejkaloi 9.71 miliardë euro.
Në qershor, Parlamenti miratoi Strategjinë Fiskale 2026-2030. Pavarësisht rritjes së huamarrjes së jashtme dhe të brendshme, niveli i borxhit shtetëror dhe publik si përqindje e PBB-së i parashikuar në Strategjinë e Menaxhimit të Borxhit Publik 2026-2030 po tregon një tendencë të lehtë në rënie, si rezultat i parashikimeve të rishikuara për rritje më të lartë të PBB-së. Ai pritet të ulet nga aktualisht 65.2 për qind si pjesë e Prodhimit të Brendshëm Bruto, në 63.5 për qind në vitin 2026, më pastaj në 62.4 për qind në 2027-ën. Në 2028 parashikohet të jetë 60.4 dhe në 2029 të ulet në 59 për qind si pjesë e PBB-së.
Gjithashtu, në tre vitet e ardhshme, vetëm bazuar në euroobligacione, shteti duhet të shlyejë 1.9 miliardë euro. Kështu, vitin e ardhshëm, 700 milionë euro do të duhet të kthehen për shlyerjen e euroobligacionit të marrë në vitin 2020, në vitin 2027, 500 milionë euro duhet të kthehen për euroobligacionin e vitit 2023, dhe në vitin 2028, euroobligacioni i marrë në vitin 2021 duhet të shlyhet në shumën prej 700 milionë eurosh.
Njëherësh, politika fiskale për periudhën 2026-2030 do të synojë përmirësimin e stabilitetit makroekonomik dhe mbështetjen e aktivitetit ekonomik nëpërmjet konsolidimit gradual fiskal. Një objektiv kryesor do të jetë përmirësimi i menaxhimit të financave publike, si dhe ruajtja e një niveli të lartë të shpenzimeve kapitale që do të mbështesin prioritetet ekonomike afatgjata.
Elementet kryesore të politikës fiskale në periudhën e ardhshme afatmesme do të jenë konsolidimi fiskal dhe marrja e masave për të siguruar qëndrueshmëri fiskale në periudhën afatmesme, pastaj disiplina në menaxhimin e fondeve publike, pra disiplina fiskale, zvogëlimi i ekonomisë informale dhe rritja e mbledhjes së fondeve në buxhetet shtetërore dhe komunale.
Politika e menaxhimit të borxhit publik do të synojë sigurimin e fondeve të nevojshme për të financuar deficitin buxhetor, për të shlyer borxhet që duhen paguar si rezultat i huamarrjes nga vitet e mëparshme dhe për financimin e projekteve, pa shkaktuar një rritje të pajustifikuar të borxhit në një nivel që mund të kërcënojë stabilitetin e ekonomisë dhe rritjen ekonomike të vendit. Në të njëjtën kohë, deficiti buxhetor si përqindje e PBB-së zvogëlohet nga 4 për qind në vitin 2025, në 3.5 në vitin 2026, 3 në vitin 2027, 3 në vitin 2028, 2.8 në vitin 2029 dhe 2.8 për qind në vitin 2030. Në të njëjtën kohë, bilanci primar buxhetor ka një tendencë në rënie, nga 2 për qind e PBB-së në vitin 2025 në 1.5 në vitin 2026, 0.9 në vitin 2027, 1 në vitin 2028, 0.7 në vitin 2029 dhe 0.6 për qind në vitin 2030. (koha.mk)
