Një stadium historik i Kupës së Botës, ndërtimi i të cilit kushtoi një shumë marramendëse parash, është braktisur pothuajse plotësisht dhe tani pret vetëm dasma.
Më shumë se një dekadë më parë, Kupa e Botës 2014 u zhvillua në vendin ikonik të futbollit, Brazil, me 12 stadiume të reja që do të prisnin ndeshjet në garën më të famshme në këtë sport.
“Arena de Amazonia” në Manaus ishte një nga stadiumet që pati privilegjin të priste katër ndeshje gjatë turneut, përfshirë humbjen 2-1 të Anglisë ndaj Italisë.
Gjithashtu, aty u zhvilluan disa ndeshje gjatë Lojërave Olimpike të vitit 2016 të organizuara në Brazil, por tani, 11 vjet më vonë, impianti me 44,300 vende është pothuajse tërësisht i braktisur, me raportet lokale që pretendojnë se përdoret për dasma.
Ndërtimi i “Arena de Amazonia” zgjati katër vjet dhe u bë i famshëm si vendi më i vështirë për t’u arritur për tifozët që udhëtonin për Kupën e Botës, pasi ndodhet në mes të pyllit tropikal të Amazonës.
Ndërtimi i stadiumit i kushtoi Brazilit një shumë të pabesueshme prej 217 milionë paundësh dhe tragjikisht çoi në humbjen e jetës së tre personave.
Por tani, ai qëndron kryesisht i papërdorur, duke pritur herë pas here ndeshje lokale që tërheqin turma prej më pak se 1 mijë personash, shumë nën kapacitetin e stadiumit.
Që nga Kupa e Botës dhe Lojërat Olimpike, stadiumi ka pritur gjithashtu disa ngjarje të krishtera ungjillore dhe një koncert të Guns N’ Roses në vitin 2022.
Sekretari i Sekretariatit Shtetëror për Rininë, Sportin dhe Kohën e Lirë lëshoi dekrete që i lejonin stadiumit të priste ditëlindje dhe dasma.
Raporti pohon më tej se mirëmbajtja e stadiumit kushtonte rreth 850 mijë e 500 paundë në vit, por nuk kishte arritur të gjeneronte as një të tretën e kësaj kostoje brenda dy viteve të para të ekzistencës së tij.
Prandaj, nuk është çudi që fotot e fundit të stadiumit tregojnë se ai është në gjendje të tmerrshme krahasuar me Kupën e Botës 2014, të cilën e fitoi Gjermania.
Pjesa më e madhe e çatisë së stadiumit është hequr, që do të thotë se ulëset në të gjithë stadiumin kanë humbur pothuajse të gjitha ngjyrat për shkak të dritës së diellit në Manaus.
