Presidenti i SHBA-së, Donald Trump, ka rindezur debatin mbi shëndetin dhe ilaçet, pasi zbuloi se merr 325 mg aspirinë çdo ditë, një dozë më e lartë se sa rekomandojnë mjekët e tij, duke pretenduar se e bën këtë për të “holluar gjakun”. Ai tha se kjo zgjedhje shpjegon edhe mavijosjet e shpeshta në duar që kanë ngritur pyetje në publik në lidhje me gjendjen e tij.
Deklaratat e Trump shkaktuan një sërë pyetjesh në lidhje me përdorimin racional të aspirinës, përdorimin e saj parandalues dhe efektet e saj në shëndetin kardiovaskular.
Mjeku i tij personal, Dr. Sean Barbabella, konfirmoi dozën, duke vënë në dukje se shëndeti i presidentit amerikan është në “gjendje të shkëlqyer”. Megjithatë, sipas Klinikës Mayo, doza e ulët e aspirinës në mënyrë parandaluese për të mbrojtur shëndetin kardiovaskular zakonisht varion nga 75-100 mg në ditë.
Megjithatë, doza prej 325 mg-shumë më e lartë se ajo e rekomanduar – mund të jetë e dëmshme për shumicën, duke rritur rrezikun e gjakderdhjes, pa ofruar ndonjë përfitim shtesë në parandalimin e mpiksjes.
Përtej Trump, rasti nxjerr në pah një mesazh kritik për shëndetin publik. Hulumtimet tregojnë se gati 1 në 4 persona fillojnë të marrin aspirinë rregullisht pa këshillën mjekësore. Studimet aktuale arrijnë në përfundimin se, tek njerëzit e shëndetshëm pa histori të atakut në zemër ose sëmundjeve kardiovaskulare, përfitimet e aspirinës për parandalimin parësor janë të vogla, ndërsa rreziku i gjakderdhjes serioze është real dhe rritet me moshën.
Kolegji Amerikan i Kardiologjisë dhe Shoqata Amerikane e Zemrës nuk e rekomandojnë aspirinën për parandalimin parësor pas moshës 70 vjeç. Tek njerëzit 40-70 vjeç, përdorimi i saj mund të merret në konsideratë vetëm nëse rreziku kardiovaskular është i lartë dhe rreziku i gjakderdhjes është i ulët. Përfundimet përkatëse janë botuar edhe në Revistën e Kolegjit Amerikan të Kardiologjisë, duke theksuar se shumë qytetarë i mbivlerësojnë përfitimet e aspirinës dhe i nënvlerësojnë rreziqet.
