Igli Tare është zyrtarisht drejtori i ri sportiv i Milanit. Kontrata është firmosur në orën 13:00 në ditën e sotme, në 23 maj. Një firmë e hedhur që vulos gjithçka, ndërsa në orët në vazhdim do të zyrtarizohet gjithçka nga faqja zyrtare e Milanit.
Kështu Tare ka nënshkruar për dy sezone te Milani, me të drejtë rinovimi edhe për një sezon tjetër. Sa i përket pagesës së tij, mediat italiane theksojnë se Tare do të përfitojë rreth 1 milionë euro neto në sezon. Kërkesa e Iglit ka qenë vetëm një në marrjen e kësaj detyre, ai ka kërkuar liri të plotë të punës së tij për të sjellë lojtarët që ai mendon se do të jenë pjesë e rëndësishme e Milanit në të ardhmen, por njëkohësisht për të zgjedhur edhe trajnerin që ai mendon se do t’i përshtatej më mirë këtij projekti.
Sipas asaj që ka zbuluar Calciomercato.com, njoftimi zyrtar i emërimit të ish-lojtarit të Lazios do të bëhet vetëm në fillim të javës së ardhshme.
Igli Tare do të jetë menjëherë operativ së bashku me Geoffrey Moncada për të përcaktuar strategjitë që do të zbatohen në tregun e transferimeve. Zgjedhja e parë e rëndësishme do të jetë ajo e trajnerit, ku klubi kuqezi duhet të kompensojë terrenin e humbur.
Midis Italianos dhe Allegrit, kontakte të rëndësishme priten që këtë javë. Mbetet të shihet nëse ekzekutivi shqiptar do të përpiqet të përmirësojë marrëdhënien me Maurizio Sarrin, një skenar mjaft i pamundur për momentin.
Jo vetëm zgjedhja e trajnerit të ri e pret Igli Taren: çështja e parë e vështirë për t’u zgjidhur do të jetë shitja e mundshme e Tijjani Reijnders te Manchester City. Edhe nëse në këtë rast, bisedimet kanë vazhduar prej disa ditësh drejtpërdrejt midis dy pronarëve. Në krye të axhendës janë edhe situatat në lidhje me kontratat që skadojnë në vitin 2026 të Theo Hernandez dhe Maignan.
