Në një kohë kur tensionet globale po përshkallëzohen dhe konkurrenca gjeopolitike në hapësirën detare po intensifikohet, Rusia ka lëshuar një sinjal të fortë strategjik me fillimin e stërvitjeve masive ushtarake të koduara “Stuhia e Korrikut”. Me pjesëmarrjen e të gjitha flotave të saj kryesore dhe mbi 15,000 trupa, Moska po demonstron aftësinë për të projektuar forcë në disa prej pikave më të nxehta të globit, nga Oqeani Paqësor deri në Detin Kaspik. Këto manovra nuk janë vetëm një test i kapaciteteve teknologjike dhe operative të Marinës Ruse, por edhe një mesazh i qartë për Perëndimin, veçanërisht për Bashkimin Evropian: Rusia mbetet një fuqi detare globale, e gatshme të mbrojë interesat e saj me forcë dhe vendosmëri. Ministria Ruse e Mbrojtjes njoftoi se në stërvitje do të marrin pjesë 150 anije, 120 avionë, 10 sisteme raketash bregdetare, afërsisht 950 pajisje të specializuara dhe mbi 15,000 personel. Ato do të mbahen nga 23 deri më 27 korrik dhe do të zhvillohen në katër pika të nxehta strategjike: Oqeani Paqësor, Arktiku, Deti Baltik dhe Deti Kaspik. Qëllimi i stërvitjeve? Sipas ministrisë, ato janë të testojnë gatishmërinë e grupeve detare për t’iu përgjigjur sfidave operacionale jo standarde, përdorimit të armëve me rreze të gjatë veprimi dhe teknologjive të tjera të përparuara, duke përfshirë sistemet pa pilot.
“Stuhia e Korrikut”
“Nga 23 deri më 27 korrik, nën udhëheqjen e përgjithshme të Komandantit të Përgjithshëm të Marinës Ruse, Admiral Alexander Moiseyev, stërvitja operative e Marinës Ruse “Stuhia e Korrikut” do të zhvillohet në ujërat e oqeaneve Paqësor dhe Arktik, deteve Baltik dhe Kaspik, me pjesëmarrjen e forcave të Flotave Veriore, Paqësore dhe Baltike dhe Flotiljes Kaspike”, tha Ministria e Mbrojtjes Ruse në një deklaratë. Manovrat pritet të përqendrohen, ndër të tjera, në përdorimin e integruar të armëve precize me rreze të gjatë veprimi, sistemeve pa pilot dhe teknologjive të përparuara ushtarake. Ato gjithashtu do të përfshijnë sulme individuale dhe të koordinuara kundër objektivave të simuluara të armikut dhe grupeve detare. Mund të supozohet me siguri se ekipet detare do të kryejnë një sërë detyrash luftarake, duke përfshirë luftën anti-nëndetëse, mbrojtjen e bazave detare dhe zonave ekonomike detare, mbrojtjen kundër sulmeve ajrore, automjeteve sipërfaqësore pa pilot dhe droneve, si dhe mbrojtjen e korridoreve detare të transportit detar.
Stërvitje me Iranin
Nuk mbaron me kaq, sepse sipas raportimeve të medias iraniane, Irani dhe Rusia kanë “nisur një stërvitje të përbashkët detare ” në Detin Kaspik. Këto operacione u dërgojnë një mesazh Shteteve të Bashkuara në lidhje me bashkëpunimin midis forcave të armatosura iraniane dhe ruse, vetëm disa javë pasi SHBA-të iu bashkuan Izraelit në sulmin ndaj centraleve bërthamore të Teheranit. Stërvitjet, të koduara nga Tasnim me emrin CASAREX 2025, janë ushtrime të përbashkëta shpëtimi dhe sigurie detare dhe përfshijnë pjesëmarrjen e Marinës Iraniane, Marinës së Korpusit të Gardës Revolucionare Islamike, Komandës së Zbatimit të Ligjit të Republikës Islamike të Iranit dhe Marinës së Federatës Ruse.
Objektivi
“Eventi do të mbahet nën sloganin ‘Së bashku për një Det Kaspik të Sigurt’. Objektivi kryesor i operacionit është forcimi i sigurisë detare, duke promovuar njëkohësisht një bashkëpunim më të madh midis forcave detare të këtyre vendeve”, shpjegoi agjencia iraniane e lajmeve IRNA. Kujtojmë se, sipas shumicës së renditjeve publike, Rusia komandon marinën e tretë më të fuqishme në botë, pas Kinës dhe Shteteve të Bashkuara, pavarësisht se pësoi një sërë humbjesh të profilit të lartë në luftën në Ukrainë. Stërvitja masive “Stuhia” e korrikut tregon ambiciet e mëdha detare të Moskës.
