Lajme

“Mos i besoni Putinit”, Britania paralajmëron Evropën: Të njëjtat garanci dha edhe para pushtimit të Ukrainës

Londra i dërgon një mesazh të prerë Kremlinit, duke theksuar se presidenti rus nuk mund t’i diktojë Evropës kushtet e tij. Britania këmbëngul se çdo marrëveshje paqeje duhet të jetë e pranueshme për Ukrainën.

Britania e Madhe ka paralajmëruar Evropën dhe ka kërkuar që deklaratat dhe premtimet e presidentit rus, Vladimir Putin, të mos merren si të mirëqena.

Gjatë një vizite në bazën detare Faslane, ku priti personelin e kthyer nga një nëndetëse bërthamore britanike, përfaqësuesi i qeverisë britanike Wes Streeting, theksoi se Putin nuk është në pozicionin për t’i imponuar kushte pjesës tjetër të Evropës.

Deklaratat vijnë në një moment kur diskutimet për një marrëveshje të mundshme paqeje në Ukrainë kanë rikthyer në vëmendje çështjen e lëshimeve territoriale dhe garancive të sigurisë për Kievin.

Presidenti ukrainas, Volodymyr Zelenskyy, deklaroi gjatë fundjavës se Shtetet e Bashkuara kishin hedhur si ide tërheqjen e Ukrainës nga rajoni i Donbasit, në këmbim të anëtarësimit në NATO.

I pyetur për këtë propozim, përfaqësuesi britanik theksoi se përfundimi i luftës duhet të vijë përmes negociatave, por se asnjë marrëveshje nuk mund të arrihet duke anashkaluar interesat dhe vullnetin e Ukrainës.

Ai riafirmoi mbështetjen e Londrës për Kievin, ndërsa paralajmëroi vendet evropiane të tregojnë kujdes ndaj deklaratave të Kremlinit se Rusia nuk synon një konflikt me Evropën.

“Ndërsa ai vazhdon të pretendojë se nuk dëshiron luftë me Evropën, dha pikërisht të njëjtat garanci edhe për Ukrainën, përpara se të niste luftën. Prandaj, na falni nëse nuk i marrim si të vërteta deklaratat e Putinit”, u shpreh ai.

Mesazhi i Londrës është se çdo përpjekje diplomatike për t’i dhënë fund konfliktit duhet të mbështetet në garanci të besueshme sigurie dhe në një marrëveshje që Ukraina e pranon.

3sgIgLJ.png