Agjencia Ndërkombëtare e Energjisë (IEA) ka rekomanduar çlirimin më të madh në histori të rezervave strategjike të naftës nga vendet anëtare të saj, në përgjigje të rritjes dramatike të çmimeve të naftës si pasojë e luftës midis SHBA-së, Izraelit dhe Iranit. 32 vendet anëtare të IEA-s ranë dakord të lirojnë 400 milionë fuçi naftë nga rezervat emergjente.
Kjo është një ndërhyrje e rëndësishme nga Agjencia Ndërkombëtare e Energjisë , por lirimi i një të tretës së rezervave që mbajnë qeveritë e saj nuk është diçka që mund ta përsërisë shpesh.
Ato 400 milionë fuçi naftë janë afërsisht aq sa përdor bota gjatë katër ditëve, ose aq sa, në rrethana normale, rrjedh përmes Ngushticës së Hormuzit në 20 ditë.
Është një sinjal qëllimi nga 32 qeveritë që përbëjnë IEA-n, se ato duan të kufizojnë valët tronditëse në ekonominë globale.
Megjithatë, ata mbeten në mëshirën e tregjeve dhe tregtarët e energjisë duket se e shpërfillën ndërhyrjen. IEA i përshkroi “sfidat e tregut të naftës” si “të paprecedentë në shkallë”, lloji i gjuhës që normalisht nënkupton çmime më të larta.
Pati një rënie të vogël të çmimeve të naftës ndërsa u njoftua, por çmimet u rritën përsëri shpejt sepse mbetet e paqartë se kur do të përfundojnë luftimet dhe kur furnizimet me naftë, në vend të rezervave, do të rrjedhin përsëri lirshëm.
